Piav Ntawv Ntshiab yooj yim 2.
Hnub no peb rov mus saib thawj lub txheej dua ib zaug, vim peb yuav tsum saib 46 phau ntawv nyob saum lub txheej ntawv kom txhua. Peb yuav pom tias cov ntawv teeb ua ke ua 4 txheej, thiab thawj txheej muaj 5 phau. Cov His Xas Lais tsis tau hu tsib phau ntawv no ua tsib txoj cai, thiab lawv hu ua ntawv torah. Zoo li yog nws faib ua tsib ntu cia siv nyob hauv kev ua thiab txoj cai. Torah yog txhais tias His Xas Lais “txoj cai”. Tsib phau ntawv ntawd tseem ceeb thiab muaj nqis heev rau cov His Xas Lais thiab yog yam ntshiab tshaj. Vim li cas lawv thiaj hu cov ntawv ntawd ua torah los txoj cai ? Torah yog los ntawm xeem lus Hes Nplaws tias : “Yara”. Yog hais txog kev tua hneev nti mus rau ib qho chaw twg. Torah ua kom cov His Xas Lais pom lawv txoj hau kev, yog txoj kev uas lawv yuav mus raws.
Hnub no peb pom lo lus “Bereshit” txhais tias “Hauv paus”. Nyob hauv ntawv Hauv Paus Tswv Ntuj tsim lub ntuj thiab lub ntiaj teb 7 hnub. Tswv Ntuj tsim neeg nyob hauv hnub 6 thiab hnub 7 Tswv Ntuj so. Tam sim no peb los rau ntu ob hauv ntawv Hauv Paus. Txij zaj 12 mus txog qhov kawg, cov poj yawm txwv koob nto npe kawg. Xws li Has Nplas Has, His Xas Has, Yas Kos.
Peb los pib nyob hauv Has Nplas Has uas nws nyob hauv lub nroog Us, yog lub nroog nto npe thiab tseem ceeb heev. Lub nroog ntawd yog nyob rau qhov twg ? Lub nroog ntawd nyob Hais Nkws Tos teb thiab nyob ze Npas Npis Los. Has Nplas Has nyob xyaw cov neeg teev ntau tus dab. Muaj ib hnub Tswv Ntuj thiaj tuaj cuag Has Nplas Has thiab tshoj nws siab kom nws tawm ntawm thaj tsam teev ntau tus dab thiab mus rau thaj av uas Tswv Ntuj qhia nws. Tswv Ntuj cog lus rau Has Nplas Has tias : “Koj yuav ua tas ib tsoom neeg coob dua cov hnub qub nyob saum ntuj leej txiv.”
Thaum Tswv Ntuj hu Has Nplas Has, mas nws twb laus lawm, thiab nws tus poj niam Xas Lais kuj tab seeb tsis muaj me nyuam. Has Nplas Has tso siab rau Tswv Ntuj thiab nov yog qhov qhia txog Has Nplas Has txoj kev tsiv teb chaws. Has Nplas Has sawv kev mus rau lub nroog Has Laas thiab mus txog Kas Nas Has teb. Nws thiaj mus nyob Hes Nploos. Has Nplas Has tsis muaj tub ki. Thaum Has Nplas Has muaj 100 xyoo, Xas Lais thiaj xeeb tub thiab yug tau His Xas Has. His Xas Has yog tus Tswv Ntuj yuav nrog nws cog lus. His Xas Has yug Yas Kos thiab Yas Kos yug tau nws 12 tug tub. Yas Kos yog tus tsa His Xas Lais 12 lub xeem. Has Nplas Has lub hnub nyoog muaj 137 xyoo.
Zaj hais txog Mais Xes, thiab cov His Xas Lais hla teb chaws suab puam 40 xyoo. Cov His Xas Lais pib khiav mus rau Kas Nas Has uas nyob qaum teb. Lawv khiav raws tus ntug dej hiav txwv Mes Dis Tes Las Nes. lawv los txog lub roob Xis Nais. Mais Xes thiaj mus txais Tswv Ntuj 10 lo lus qhia nyob saum lub roob Xis Nais. Lawv cog lus tias lawv yuav ncaj ncees rau Tswv Ntuj. Lawv mus txog lub roob Nes Npos uas nyob Muas teb, ces Mais Xes tuag nyob ntawd. Tom qab Mais Xes tuag tas, mas tus coj cov His Xas Lais khiav hla teb chaws suab puam yog Yos Xuas. Yos Xuas coj cov His Xas Lais khiav hla tus niam dej Yos Las Das thiab coj lawv mus txog thaj av cog lus.
Kwv tij Hmoob sawv daws ! Hnub no peb piav Ntawv Ntshiab yooj yim los yog piav Ntawv Ntshiab luv luv los xaus li no xwb. Yog xav kom nkag siab txog Ntawv Ntshiab tiag tiag, mas yuav tsum mus ua tib zoo nyeem nyob hauv phau ntawv Hauv Paus tuaj mus. Ces thiaj yuav nkag siab txog kev ntseeg lub keeb tiag. Thov Huab Tais Yes Xus Pleev lub txiaj ntsim nrog nej nyob, qhib nej lub siab kom maj mam to taub txog kev ntseeg. Lwm zaus peb mam sib ntsib dua, nej sawv daws nyob zoo !
