100 Love for the poor
100 Kev nyiam kev hlub uas muaj rau cov neeg pluag.
Vaj Qhia Npes Nes Dis qhia peb tias lub Koom Txoos tau ua 3 yam tseem ceeb. Kuv pom tias zaj no ua kom peb nkag siab meej kawg. Ntawd yog lub Koom Txoos teev Tswv Ntuj, lub Koom Txoos qhia lub Moo Zoo thiab lub Koom Txoos ua hauj lwm rau cov neeg pluag txom nyem. Nyob hauv 3 yam no, tas txhua yam uas peb ua kuj yog ib feem nyob hauv 3 yam. Yog tias koj ua tib zoo xav txog 3 tug Vaj Qhia ua ntej tus Vaj Qhia zim txwv no, mas koj yuav pom tias txhua tus Vaj Qhia puav leej hais txog ib qho nyob hauv 3 yam no. Zam Paj Lug Ob hais txog : “Kev tshaj lub Moo Zoo, nws yog tus Vaj Qhia ntawm kev tshaj lub Moo Zoo tus txheej txheem tshiab mus thoob ntiaj teb, kom tau tshaj lub Moo Zoo. Vaj Qhia Npes Nes Dis yog tus saib xyuas cov kab ke, kev teev Tswv Ntuj thiab kev cav txog Tswv Ntuj raws kev cai. Vaj Qhia Fas Ntshis Kus yog tus khuv leej cov neeg pluag tiag tiag. Tas 3 tug Vaj Qhia puav leej muab siab rau txog 3 yam no. Tab sis txhua yam nyias muaj nyias qhov zoo.
Koj nco puas tau thaum Vaj Qhia Fas Ntshis Kus raug xaiv ua Vaj Qhia ? Tus Tswv Qhia Liab Humus nyob Nplas Xis uas yog ib tug nyob hauv Vaj Qhia cov phooj ywg. Nws mus ntsib Vaj Qhia thiab hais tias : “Txhob hnov qab cov neeg pluag nawb.” Thiab Vaj Qhia ib txwm tsis tau hnov qab txog cov neeg pluag li. Muaj ib zaug, Vaj Qhia hais tias nws xav tau lub Koom Txoos pluag txom nyem rau cov neeg pluag txom nyem. Ntawd yog lub zog txhawb siab me me hauv nws lub neej thiab nws cov kev ntseeg.
Kev txais yam no los ua, ua kom pom tias nws coj raws tej kab lis kev cai uas muaj nqis hauv Kav Tos Liv. Sim xav txog coob leej neeg hauv lub Koom Txoos seb, xws li Leej Niam Tes Les Xas Kas Nkws Tas, Leej Ntshiab Vincent de Paul, Dorothy Day, Martin Diores, Pob Zeb Claver, Fas Ntshis Vizi, Zam Chrysum, As Nplos Xyus nyob Milan thiab coob leej tas hauv tiam neeg. Cov thawj coj cov neeg ntseeg thiab Kav Tos Liv puav leej xav tias kev khuv leej cov neeg pluag, yog lub haus paus tseeb tiag. Tam sim no txoj kev khuv leej no ri mus nyob hauv tej kab lis kev cai, thiab nws kuj rov hais txog Ntawv Ntshiab. Yes Xus tus ua xyem xyav hauv kev txhawj xeeb cov neeg pluag. Thiab tig rov mus rau cov Yaj Saub Hes Nplaws seb, lawv puav leej yog cov txhawb nqa cov neeg pluag. Kuv nco txog Yes Les Mias, His Xais, Es Xes Kias, Das Nias thiab lwm tus Yaj Saub. Tej zaum As Mos kuj yog ib tug Yaj Saub me nyob hauv cov Yaj Saub, uas lawv sau tej phau ntawv luv luv. As Mos yog tus Yaj Saub loj ntawm kev ncaj ncees hauv zej zog thiab txhawj xeeb cov neeg pluag txom nyem. Qee zaus peb kheev kheev ntsia tsis pom txog zaj no. Muaj tseeb tiag uas cov neeg coj kev ntseeg nruj, lawv nyob ntawm cov neeg pluag ib sab. Tab sis txheej thaum ub no, nws raug hloov mus. Ces cov neeg pluag thiab nyob qis hauv zej zog thiaj raug hnov qab. Lawv rais ua cov neeg uas luag ntsia tsis pom. Neeg tsuas yog muab siab rau txog cov neeg nplua nuj thiab muaj hwm chim, tus ua vaj thiab tus thawj tub rog xwb. Tab sis Tswv Ntuj cov Yaj Saub loj uas nyob His Xas Lais, yog cov txhawb nqa cov neeg pluag txom nyem. Lawv coj kev pluag txom nyem tuaj rau cov neeg nplua nuj txoj kev xav. Tam sim no sim los mloog tus Yaj Saub As Mos thiab cia nws cov lus txeem mus rau cov neeg mloog lub siab. Cov txaus siab rau Xis Yoos, lawv pw nyob saum lub txaj kaus ntxhw. Lawv tau zoo pheeb rau lub kim txwv zooj. Lawv ntaus paj nruag xws li Das Vis. Lawv sau nkauj thiab tsim cov suab paj nruag. Puas yog koj xav daim duab tsis tawm ? Cov neeg nplua nuj thiab muab hlob, lawv tau zoo pw ntawm lub kim txwv zoo thiab ntaus paj nruag lom zem. Nws yog daim duab hauv tus kheej txoj kev zoo siab, thiab kuj yog daim duab tsis quav ntsej txog cov neeg tsis nplua nuj. Yog koj xav tau, As Mos hais tias :
“Lawv haus kua txiv cawv hauv tej lub ntim, thiab lawv pleev tshuaj txab txiv yoov. Tab sis lawv tsis tau mob, yog vim Yos Xes kev piam sij.”
Zaj nyeem nyob hauv As Mos no, lub hom phiaj yog pua kev rau peb txais lub Moo Zoo. Nws yog lub Moo Zoo ntawm Las Ntxas Los thiab cov neeg tuag. Tej kab ke hu lawv tias tuag, vim lub Moo Zoo tsis tau tis ib lub npe rau lawv. Lo lus tias tuag, yog hais txog cov neeg nplua nuj hauv xeem lus Latin. Li ntawd, yog Las Ntxas Los thiab tus neeg nplua nuj. Kuv tau hnov zaj ntawv Moo Zoo no tas li nyob hauv kuv lub neej. Kuv nco tau tias thaum kuv tseem yau, mas kuv tau hnov txog zaj phem no thiab nws ua rau kuv ntxhov siab.
Peb paub zaj no zoo txaus puas yog ? Tus neeg nplua nuj hnav tsos tsam xem, peb tau hnov tias ntawd yog lub Cim ntawm kev nplua nuj, vim tsuas muaj tus neeg nplua nuj xwb thiaj yuav tau cov ntaub tsam xem los hnav, thiab nws noj haus meem mias txhua hnub. Nyob ntawm tus nplua nuj lub qhov rooj, yog Las Ntxas Los.
Lub ntuj txheej thaud tsis muaj neeg quav ntsej txog cov neeg pluag. Lawv tsis raug hais txog li. Lawv raug hnov qab. Qhov tseeb tiag yog peb tsis paub tus neeg nplua nuj lub npe, tab sis peb paub Las Ntxas Los. Nws ua kom pom tias qhov tseem ceeb ntawm tus sau ntawv Moo Zoo yog dab tsi tiag ? Las Ntxas Los raug hais tawm, tab sis nws yog tus neeg qias neeg. Ntshe nws zoo siab uas nws tau noj cov mov poob ntawm tus nplua nuj lub rooj los. Tab sis tus neeg nplua nuj hla dhau mus, nws tsis quav ntsej txog. Las Ntxas Los zoo siab uas nws tau noj tej tsig mov seem ntawm tus nplua nuj. Tej zaum ntshe yog tab tom pov tej zaub mov uas Las Ntxas Los nyiam kom nkim pov tseg.
Muaj ib hnub Las Ntxas Los tuag, ces Ntuj cov Tshiab tuaj nqa nws mus nyob hauv Has Nplas Has xub ntiag. Ntawd yog cov Yus Das txoj cai hais txog Ntuj Ceeb Tsheej. Las Ntxas Los raug coj mus saum Ntuj hauv Has Nplas Has xub ntiag, tab sis tus nplua nuj raug faus nyob hauv av. Li ntawd, nov yog kev xav txog lig uas ua rau peb poob siab kawg. Koj xav tias tus nplua nuj thiab muaj hwj chim yog tus tau txais kev cawm, tab sis nws raug faus av. Hos Las Ntxas Los tau mus nyob hauv Has Nplas Has xub ntiag. Peb xav li cas txog zaj no ?
Ua ntej thov kom zaj no meem txom peb lub siab. Tab txawm peb yuav nyeem ntau zaus lawm, tsis kav thov kom zaj no meem txom peb lub siab. Kuv ntseeg tias peb tau hnov nyob hauv Mas Tais zaj 25. Nyob ntawm no dab tsi yog kev sib txawv ntawm tus neeg tau txais kev cawm thiab tus raug foom. Tsis yog hais txog kev ntseeg, qhov tseem ceeb yog thaum kuv tshaib plab, Tswv Ntuj pub rau kuv noj. Kuv nqhis dej, Tswv Ntuj pub rau kuv haus. Kuv liab qab Tswv Ntuj pub khaub ncaws rau kuv hnav. Kuv ntxhov siab Tswv Ntuj tuaj saib kuv nyob hauv tsev loj faj thiab nws tuaj cuag kuv. Nws yog kev ua los ntawm kev nyiam kev hlub uas muaj rau cov neeg pluag txom nyem. Ntawd thiaj yog qhov txawv ntawm kev cawm thiab raug foom. Kuv tsis paub yuav piav kom zoo thiab ntxaws dua no. Kuv tsis muaj lwm txoj kev yuav mem As Mos thiab zaj no. Muaj kev txhaum ntau yam uas hais txog nyob hauv Ntawv Ntshiab. Muaj tseeb tiag uas Ntawv Ntshiab paub txhua yam hais txog kev txhaum ntawm tib neeg. Tab sis kuv xav tias yam uas thov Tswv Ntuj heev tshaj, yog kev tsis quav ntsej txog cov neeg pluag txom nyem. Yam uas yuav tsim kev txawv txav rau Tswv Ntuj heev tshaj, yog qhov peb ua rau lwm tus muaj kev kub ntxhov.
Sim xav txog ntu kawg hauv zaj no seb, thaum tus nplua nuj tuag thiab muaj ib lub qhov ntuj tob kawg kem nws thiab Las Ntxas Los. Tus nplua nuj hais tias : “Txiv, thov koj xa Las Ntxas Los mus hauv kuv txiv tsev, kom Las Ntxas Los mus ua pov thawj qhia lawv. Kom lawv tsis txhob tuaj nyob hauv qhov chaw raug tsim txom no.”
Peb nkag siab lawm tias yog lawv tsis mloog Mais Xes thiab cov Yaj Saub, tab txawm tias ib tug sawv hauv qhov tuag los lawv kuj tsis ntseeg. Peb muaj cov Yaj Saub, peb muaj As Mos, Es Xes Kias, His Xais, Yes Les Mias thiab Das Nias. Peb nyeem lawv cov ntawv tas mus li. Peb muaj lawv, yog tias peb tsis mloog lawv, mas tab txawm ib tug sawv hauv cov tuag rov los peb kuj tsis ntseeg thiab.
Ntawd yog kev txhawj xeeb loj kawg rau peb txhua tus. Ib xyoos tag ib xyoos thiab, uas peb tau hnov hais txog zaj no puas yog ? Tab txawm kev nyeem Ntawv Ntshiab me ntsis xwb, tsis kav qhov kawg kuj yog hais txog qhov tseeb ntawm zaj no. Yog qhov tias peb tseem ceeb rau Tswv Ntuj. Li ntawd, tam sim no kuv thov koj qhib koj qhov Google thiab tshawb nrhiav kev khuv leej ntawm lub cev puas tau ? Nws muaj 7 yam nyob ua ke. Xws li pub mov rau tus neeg tshaib noj, pub dej rau tus neeg nqhis haus, pub chaw so rau tus tsis muaj vaj tse nyob, mus saib tus neeg raug txim, pub khaub ncaws rau tus neeg liab qab hnav, faus cov neeg tuag thiab mus saib tus neeg muaj mob. Cov hauj lwm hauv kev khuv leej 7 yam no, yog 7 yam uas koj tuaj yeem ua tau rau cov neeg pluag thiab cov raug tsim txom. Tsis yog hais txog kev ncaj ncees hauv zej zog, tab sis nws yog kev xav tau ntawm coob leej neeg nyob ntiaj teb no.
Thov ntseeg kuv mas, vim nws tseem ceeb heev. Coob leej tab tom tshaib nqhis, ces koj yuav mus nrhiav lawv, pub txhiam xws noj rau lawv los yog ua ib yam dab tsi kuj tau. Cov neeg tshaib nqhis lawv tsis muaj txhiam xws noj, ces koj yuav mus nrhiav lawv thiab ua ib yam dab tsi rau lawv. Nrhiav chaw pw rau cov neeg tsis muaj vaj tse, nrhiav kev daws teeb meem rau lawv. Pub khaub ncaws rau cov neeg tsis muaj hnav, puas muaj leej twg uas nws tsis muaj khaub ncaws hnav li ? Yog muaj tsev loj faj nyob ze koj, mas koj yuav mus saib cov neeg raug txim. Mus saib lawv, ua ib yam dab tsi rau lawv, qhia kev ntseeg rau lawv thiab pab lawv. Yog muaj tej tus neeg uas tam sim no muaj mob, mas koj yuav sau ntawv rau nws thiab hu nrog nws tham los yog mus saib nws kiag. Hais tau tias yog sob kawm loj ntawm kev tuag thiab Las Ntxas Los uas cog nyob hauv koj lub siab. Ces cia nws meem txom koj lub siab, kom koj nqis tes ua ib yam dab tsi puas tau ?
Kwv tij Hmoob sawv daws ! Hnub no peb tham txog kev nyiam kev hlub uas muaj rau cov neeg pluag los xaus li no xwb. Thov nej khaws cov lus no thiab coj mus ua raws. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua, nej sawv daws nyob zoo !
