Lo lus ‘Dab phem’ mas lus Hes Las hais tias ‘Diabolos’ txhais tias ‘tus liam neeg’, vim dab phem yog tus tos ntsoov liam neeg thiab coj neeg mus kom rau rooj plaub. Ntawm lo lus ‘Xas Tas’ mas txhais tias ‘tus tiv luag’ los yog ‘tus twm luag’.
Yes Xus tseem hu dab phem xas tas ua ‘tus ntxias neeg’, ‘tus haub neeg’, ‘tus tsis huv’, ‘tus phem’ los hais tias ‘tus yeeb ncuab’.
Thaum peb hnov zaj dab phem ntxias Yes Xus, mas peb xav paub ntau yam; xws li: dab phem puas xub paub Yes Xus, dab phem xav ua dab tsi rau Yes Xus, dab phem tawm tuaj rau Yes Xus pom zoo li cas.
Nyaj tej zaus dab phem paub tsis meej pes tsawg tias Yes Xus yog Huab Tais Leej Tub, vim Tswv Ntuj tsuas pub kom muaj 3 tug paub meej meej txog Yes Xus xwb; yog Mab Liab, Yos Xes, thiab tus ntxuav plig Zam.
Leej Ntuj Plig coj Yes Xus mus rau teb chaws suab puam kom tau sim 3 yam li no:
1) Yes Xus puas yuav vam txog cov txhiam xws tsis tuaj ntawm Tswv Ntuj tuaj,
2) Yes Xus puas yuav ua raws nws lub siab ntshaw,
3) Yes Xus puas yuav nrauj Tswv Ntuj mus saib lwm yam loj dua.
Hais txog tias dab phem tawm tuaj zoo li cas, mas cov kws piav lub Moo Zoo hais tias tej zaum Yes Xus pom thiab hnov dab phem ntxias nws nyob hauv nruab siab zoo li niaj hnub no peb hnov lub tswv yim phem hais rau peb tas zog kom ib siab mus rau qhov tsis zoo, los yog tej zaum dab phem txia ntshis ua tej tus neeg muaj hwj chim tawm tuaj rau Yes Xus pom xyeem thiab nrog Yes Xus tham. Txawm tias dab phem tawm tuaj zoo li cas, los lub ntsiab kuj yog zoo tib yam xwb.
Yes Xus yoo mov tau 40 hnub ib yam li Mais Xes nrog Huab Tais Ntuj nyob saum lub roob Xis Nais 40 hnub, thiab Yes Xus kuj nyob saum lub roob siab ntsia pom tas lub ntiaj teb xws li thaum Mais Xes nyob saum lub roob Pis Nkas ntsia tas Kas Nas Has teb. Yes Xus thiaj zoo li yog tus Mais Xes tshiab coj Tswv Ntuj haiv neeg rov mus kom txog lub teb chaws Tswv Ntuj cog lus tias yuav muab pub rau Tswv Ntuj haiv neeg nyob. Tsis tag li ntawd, Yes Xus tseem yog Leej Pleev tus cawm qab ntuj neeg thiab. Yog li mas tus twg mloog Tswv Ntuj Lo Lus thiab muab nws fij rau Tswv Ntuj, tus ntawd thiaj yuav tau chaws mus hauv lub teb chaws Tswv Ntuj npaj tseg rau nws haiv neeg; yog Ntuj Ceeb Tsheej.
Ib tug neeg puas yuav yoo mov tau ntev tas npaud? Nyob hauv cov Yus Das kab ke, thaum lawv yoo mov mas tsuas yog yoo tsis noj dab tsi thaum nruab hnub xwb; thaum lub hnub poob qho thiab yuav kaj ntug, mas lawv noj mov. Tab sis ntawm Yes Xus mas nws tsis noj dab tsi li tsis hais nruab hnub los hmo ntuj. Tos Yes Xus ua tau li ntawd, vim nws muaj Leej Ntuj Plig Ntshiab nrog nws, mas nws thiaj nyiaj taus.
Yes Xus yog tus tsis muaj txhaum tab sis Huab Tais Tswv Ntuj kheev cia dab phem tuaj ntxias Yes Xus, yog Yes Xus yeej dab phem kev ntxias mas Yes Xus thiaj yuav ntshiab tiag, thiaj yuav coj tau Tswv Ntuj haiv neeg. Yes Xus yeej dab phem tau kuj yog vim nws mloog Leej Txiv lus.
Dab phem mas txawj ntxias neeg kawg nkaus. Dab phem pom tias Yes Xus yoo mov tau ntev hnub mas Yes Xus yeej yuav tshaib plab, ces dab phem thiaj ntxias Yes Xus kom ua hwj huam hloov cov pob zeb los ua mov; dab phem paub neeg lub siab tias neeg nyiam nrhiav ua xis neeg siab, neeg nyiam twv ntuj twv teb mas dab phem thiaj hais Yes Xus kom dhia mus lawm hauv av; dab phem paub tias neeg ntshaw muaj hwj chim koob meej nto moo lug mas nws thiaj hais Yes Xus kom pe hawm nws mas nws yuav muab tas lub ntiaj teb rau Yes Xus ua tus kav; dab phem tseem pom tias Yes Xus nyiam hais txog cov lus hauv Ntawv Ntshiab, nws thiaj muab cov nqe lus hauv Ntawv Ntshiab los ntxias Yes Xus kom mag dab phem rooj ntxiab.
Dab phem mas txawj ntxias neeg tiag tiag! Peb yuav tau ceev faj; ntaus zaus dab phem tsis ncaj qha ntxias kom peb ua phem, ntau zaus dab phem cev tej yam zoo nyob sab nraud rau peb ua kom peb txhob ua txoj hauj lwm tseem ceeb uas Tswv Ntuj txib peb ua.
Kom peb nco tias thaum Yes Xus yuav pib ua nws txoj hauj lwm tshaj Ntuj Lus, mas Tswv Ntuj kheev kom Yes Xus raug dab phem ntxias. Thaum peb yuav pib ib txog hauj lwm zoo, mas Tswv Ntuj kuj kheev kom peb raug dab phem ntxias thiab. Qhov ntawd, yog vim Tswv Ntuj xav pab peb txiav siab meej.
Thaum peb raug dab phem ntxias, peb yuav tso siab tias peb muaj Leej Ntuj Plig lub zog nres peb. Lub caij peb raug dab phem ntxias, yog zoo li ib lub caij peb nyob hauv teb chaws suab puam; kawg muaj Tswv Ntuj tib leeg xwb nrog peb nyob, pab peb. Yog peb ua neeg siab ncaj, mas Tswv Ntuj yuav txuag peb kom txhob poob rau dab phem tes xws li cov lus hauv Nkauj Paj Nruag 91 qib 11-12 tias ‘Yas Ves yuav txib nws cov Tshiab kom zov koj hauv txhua txoj kev koj mus. Lawv yuav nqa koj hauv lawv txhais tes kom koj taw txhob dawm pob zeb’.
Muaj ob peb lo lus ntxiv xws li lo lus tias ‘pej kum neeg’ yog ntxeev los ntawm lo lus ‘Gentile’ txhais tias lwm haiv neeg uas tsis yog cov Yus Das, lo lus ‘Des Kas Pos Lis’ uas yog 10 lub nroog twj lij nyob sab Toob Fab ntawm tus dej Yos Las Das.
