Hais txog lo lus tias ‘Plaub Caug’ mas cov neeg ntseeg yuav nco txog ‘Hnub Plaub Txais Tshauv’ uas yog zoo li lub qhov rooj chaws mus hauv caij Plaub Caug vim tias yog thawj hnub hauv lub caij, yog hnub tas tsoom neeg hauv lub Koom Txoos yuav ua neeg me tsis muab hlob, sawv daws yuav nyo hau cia Leej Choj muab cov hmoov tshauv nphoo saum taub hau los yog muab tus ntiv tes xoo ntsw cov hmoov tshauv los pleev ua Ntoo Cuam lub Cim saum hauv pliaj, thiab mloog Leej Choj ntuas.
Muaj tej tus yuav pom tias thaum ua lub txoos teev Ntuj nyob hauv lub caij Plaub Caug, yuav tsis hu zaj cav txog Tswv Ntuj lub koob meej tias ‘Nyob pem Ntuj, Tswv Ntuj nto meej nto moo,…’ thiab tsis hu zaj ‘As Les Lus Yas’. Cov nkauj paj nruag kuj yuav tsis hu cov nkauj lom zem.
Muaj tej tus pom tias nyob hauv lub caij Plaub Caug, lub tsev teev Ntuj yuav faib ib leeg ib lub tais khaws nyiaj cia yus ntim nyiaj coj mus pub rau cov neeg pluag txom nyem. Tej tus yuav nco tias yog lub caij yus tau mus ua hauj lwm tsim koob hmoov xws li mus pab tu cov neeg mob, mus pab lwm tus ua hauj lwm.
Nyob hauv lub caij Plaub Caug, tej tus yuav muab siab rau teev Ntuj kom ntau dua qub, tej tus yuav tuaj teev Ntuj kom ntxov dua yav tas. Muaj tej tus npaj siab yuav txais lub Cim Ntxuav. Tej tus yuav nco txog Huab Tais Yes Xus nyob hauv teb chaws suab puam 40 hnub, Mais Xes nrog Tswv Ntuj nyob saum lub roob Xis Nais 40 hnub, dej nyab ntiaj teb 40 hnub, cov His Xas Lais nyob hauv teb chaws suab puam 40 xyoo.
Peb yuav xav zoo li cas los xij, tab sis lub ntsiab tob tob hauv caij Plaub Caug mas yog lub sij hawm cia rau peb tau npaj siab thiab npaj lub neej kom ntshiab txaus chaws mus koom ua Hmoov Hla uas yog hnub Huab Tais Yes Xus sawv rov los. Hnub ntawd, tas sawv daws yuav zoo siab luag ntxhi tsa ncauj nqua suab tias “Huab Tais Yes Xus sawv rov los, As Les Lus Yas, As Les Lus Yas.”
Ua ntej Huab Tais Yes Xus yuav leg nws Txiv txoj hauj lwm cawm ntiaj teb neeg, Huab Tais Yes Xus tau muab 40 hnub sib law los ua tej yam zoo li nram no; yam li Huab Tais Yes Xus npaj muab nws ua cov txim txi rau Tswv Ntuj kom tau txhiv tas qab ntuj neeg, Huab Tais Yes Xus teev Ntuj kom tau nrog Leej Txiv tham txog nws lub luag hauj lwm zaum no, thiab Huab Tais Yes Xus yoo mov ua ib yam zeem tseeb tias tsis muaj dab tsi yuav tseem ceeb tshaj Leej Txiv Tswv Ntuj tus tsim ntuj tsim teb lawm.
Huab Tais Yes Xus 3 yam saum no muab xaus tau zoo li no tias: qee koj tus kheej pub rau lwm tus, teev Ntuj nrog Tswv Ntuj tham, thiab yoo nqaij yoo mov kom tau txuag yam Tswv Ntuj tsim.
Peb yam tau hais los no, yog tus qauv cia rau cov neeg ntseeg sawv daws yoog raws nyob hauv caij Plaub Caug no, mas sawv daws thiaj yuav tig los yuav tau lub siab tshiab thiab hloov tau lawv lub neej.
Huab Tais Yes Xus tau ntuas cov thwj tim kom ua tib zoo xav txog 3 yam ntawd raws li tus Hauv Paus Xa Lus Mas Tais khaws tseg cia hauv nws phau ntawv Moo Zoo tias “Nej ceev faj, nej txhob ua ncaj nyob ntawm neeg xub ntiag xwb, kom luag qhuas nej. Thaum koj teev Ntuj, koj mus nyob twj ywm hauv koj kem txaj, kaw koj qhov rooj ces koj teev koj Txiv uas nws nyob hauv qhov chaw nraim. Thaum nej yoo mov, nej txhob ua ntsej muag ntshaus xws li cov neeg zoo sab nraud, hos koj, mas thaum koj yoo mov, koj yuav pleev tshuaj tsw qab saum taub hau, koj ntxuav muag kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb (MT 6: 1, 6, 16-18). Huab Tais Yes Xus cov lus ntuas no muab nthuav tau zoo li no:
Thaum koj pub yam koj muaj rau lwm tus neeg, koj tsis yuav qhia rau sawv daws paub tias koj tau pub rau lawv kom sawv daws qhuas koj; koj txhob xav tias koj pub rau lwm tus kom cov txiaj ntsim ntawd rov poob rau saum koj tib tug xwb; tsis yog yam koj pub ntawd, koj tau nyiag tau txeeb luag lwm tus los ces koj tu siab koj thiaj muab pub rau lwm tus mus; thiab koj txhob pub yam koj tsis yuav lawd rau lawv, koj tsum pub yam koj muaj mas thiaj yog.
Thaum koj teev Ntuj, mas koj txhob ua kom luag qhuas tias koj yog tus neeg ntseeg zoo ntseeg ruaj; koj txhob lam teev Ntuj kom tau laug lub sij hawm los yog vim luag tej hais kom koj teev; thaum koj teev Ntuj koj yuav tau qhib siab luag txais Tswv Ntuj, mloog Tswv Ntuj lo lus hais rau koj nruab siab, thiab koj yuav tau coj mus ua nyob hauv koj lub neej.
Thaum koj yoo mov yoo nqaij txhob ua niag ntshau ntshau kom lug paub tias koj tab tom coj kab ke yoo; koj yoo mov tsis yog vim koj xav txuag nyiaj txuag txiaj los yog vim koj xav tau lub cev zoo nkauj ntxim sawv daws ntsia xwb.
Nyob hauv lub caij Plaub Caug no, Tswv Ntuj xav kom peb sib thooj siab koom ntsws, sib pab sib nres, tsob hwb cov neeg txom nyem, kub siab teev Ntuj mloog Ntuj lus, tshaj lub Moo Zoo rau cov nyob ib puag ncig, thiab coj lub neej tus, ua neeg pluag hauv nruab siab.
Ib txwm los, thaum txog caij Plaub Caug cov neeg ntseeg hauv lub Koom Txoos yuav ua 3 yam hauj lwm li no: ua kab ke yoo, pub rau tus neeg txom nyem, thiab teev Ntuj.
1. KAB KE YOO: Nyob hauv Ntawv Ntshiab pom tau tias kab ke yoo yog txoj hauj lwm txuam nrog kev teev Ntuj xws li thaum cov neeg ntseeg hauv As Nthias Kias teev Ntuj thiab ua kab ke yoo, ces Leej Ntuj Plig Ntshiab qhia lawv kom xa Npas Nas Npes thiab Xauv mus ua txoj hauj lwm tshaj lub Moo Zoo (HL 13L 1-3), thiab nkawd kuj tau nrog sawv daws teev Ntuj thiab yoo mov tas mas thiaj tsa ib co txwj laus (HL 14: 23). Leej Ntshiab Aus Nkus hais tias “Tsis muaj tus twg yuav ua xyem xyav tias kev them txim thiab kab ke yoo yog qhov tsis muaj txiaj ntsim, vim tias thaum ib tug neeg twg txaus siab coj kab ke yoo mas txhais tias nws tab tom ntshaw txog yam nws thov tiag. Yog li thiaj muaj tej lo lus hais tias “Kev teev Ntuj yuav muaj zog thaum coj kab ke yoo” (TN 12: 8) vim li ntawd, thaum peb yoo mov teev Ntuj Tswv Ntuj thiaj yuav mloog peb lo lus thov. Kab ke yoo thiaj yog ib txoj kev pab kom tus neeg ntawd muab siab rau teev Ntuj.
Tsis tas li ntawd xwb, thaum peb ua cov kab ke yoo mas yog peb tab tom koom nrog cov kwv tij nkauj muam lawv koom kev tshaib, yog ib txog kev khaj cai nriav kev ncaj ncees rau cov neeg raug quab yuam.
Nyob hauv lub ntuj tiam neeg no, muaj cov neeg tshaib nqhis txog 1 feem 3 ntawm tag nrho ntiaj teb neeg. Sawv daws muaj feem ua txhaum rau lub sim ceeb no yog li mas kab ke yoo thiaj yuav pab tau peb kom lees tias peb muaj feem tsim kev tshaib nqhis rau peb cov kwv tij nkauj muam lwm tus, peb tsim nyog nrog pab lawv, peb yuav tau hloov peb lub neej noj seem noj pov tseg no, peb yuav tau nrog lwm tus txuag zaub mov pub rau cov neeg tshaib tau noj kom tsau plab.
Dhau ntawm zaub mov lawd, peb yuav tau yoo txhua yam peb siab ntshaw thiab, xws li nkaub ncaws, dej cawv, kev ntxias neeg mus ua txhaum.
Kab ke yoo tseem yog ib yam hauj lwm them txim thiab, vim tias neeg nyiam ua tsis nruj rau neeg, ces neeg thiaj poob rau txoj kev txhaum vim lub siab nyiam ua ywj lub tswv yim; neeg thiaj poob rau txheej qis. Yog li cov neeg ntseeg thiaj yuav xyaum tswj yus lub siab kom nyiam nrhiav Tswv Ntuj mus li, kom yus tswj tau yus lub siab ntshaw ua txhaum raws li Leej Ntshiab Aus Nkus hais tias “Yog peb xav yoo tiag mas peb tsum tso tseg kev ua txhaum”, yog li kev yoo thiaj tsum khiav kom deb txoj kev ua txhaum thiab ua siab tawv qawv tawm tsam dab phem txoj kev haub ntxias peb lub siab.
Thaum peb yoo mas peb yuav ras ntsoov tias yog peb tab tom coj kab ke yoo kom peb tus plig zoo txhij raws li Leej Pleev tus lwj lwm, peb yoo kom tau koom nrog Leej Pleev raug txom nyem.
2. PUB THIAB NYIAM LWM TUS: Leej Ntshiab Vaj Qhia Les Os tau hais tseg tias “Txhua tus Leej Ntshiab puav leej hais txog kev nyiam, kev zam txhaum, thiab kev pub rau cov neeg txom nyem.”
Kev zam txhaum yog kev sib nyiam loj tshaj, yog li Leej Ntshiab Vaj Qhia Les Os thiaj hais tias “Peb yuav tau zam txhaum rau lwm tus, mas peb thiaj yuav tau txais kev zam. Peb yuav zam rau lawv raws li peb tau nrhiav. Peb thov Ntuj pab peb kom txawj zam txhaum rau lwm tus, tsis txhob nrhiav kev sib pauj rov.”
Nws hais ntxiv tias txhua lub caij zoo rau peb ua hauj lwm sib nyiam, tab sis lub caij Plaub Caug yog lub caij zoo tshaj rau peb tau ua hauj lwm nyiam luag tej. Tus twg xav kom nws lub tswv yim thiab lub cev ntshiab txaus koom cav txog Leej Pleev kev Hla, mas nws yuav ua tiag ua hauj lwm sib nyiam vim kev nyiam ntim txhua yam txiaj ntsim thiab kev nyiam ntxuav tau txhua yam txhaum. Yog li ua ntej no peb thiaj yuav npaj tus kheej kom zoo txaus ua cov txim cev rau Tswv Ntuj, peb yuav ua siab dav, zoo siab txais cov neeg txom nyem thiab quaj ntsuag tuaj so hauv peb, ces lawv yuav cav txog Tswv Ntuj mus li. Peb yog neeg ntseeg, tsis muaj dab tsi yuav xis Tswv Ntuj siab tshaj qhov tias peb tau pab cov neeg txom nyem, cov pluag. Thaum peb pub rau lwm tus, txhob ntxhov siab tias kuv tsis muaj nyiaj muaj txiaj pub rau, kom peb paub tias lub siab dav yuav muaj nqis dua ib txhab nyiaj txhab kuj. Yeeb vim lub siab nthuav dav, Leej Pleev thiaj ua kom cov ncuav mov ntsu txaus pub sawv daws noj tsau. Thaum peb pub rau cov neeg tshaib cov neeg txom nyem, mas yog peb nyiam lawv.
Yam yooj yim tshaj uas neeg yuav pub rau lwm tus tau mas yog nyiaj txiag, yog li lub Koom Txoos thiaj nqua hu sawv daws kom qee yus li nyiaj los pub ua peev rau cov neeg txom nyem nyob hauv caij Plaub Caug no. Dua li mas peb muaj peev xwm yuav pub lwm yam peb muaj rau cov tsis muaj xws li pub lub sij hawm mus saib xyuas cov neeg mob, pab tu cov neeg laus, pab txhawb siab rau tus neeg qaug zog, pab ris yus tus txij nkawm lub luag hauj lwm.
3. TEEV NTUJ: Peb pom tias niaj hnub Huab Tais Yes Xus tsum xub teev Ntuj tso mam ua lwm yam. Ntawm peb mas txij thaum yaus los txog niaj hnub no, peb niam peb txiv qhia thiab coj mus teev Ntuj, tej zaus zoo li lawv yuam kom peb mus, ces peb lam mus kom tas xwb.
Peb txhob ua zoo li ntawd, peb yuav niaj hnub zoo siab hlo teev Ntuj xws li Huab Tais Yes Xus vim peb yog Tswv Ntuj me nyuam, peb yuav tau nrog peb Txiv sib tham txuas lus txhua hnub mas thiaj yog.
Vim li ntawd, nyob hauv caij Plaub Caug no thiaj yog lub cib fim zoo rau peb tau rov mus cuag peb Txiv, nrog nws tham, mloog nws cov lus hais rau peb nyob hauv nruab siab thiab hauv Ntawv Ntshiab. Peb yuav mus thov txim ntawm peb Txiv, kom nws zam lub txim pub rau peb, thiab peb yuav sib zam txim ntawm peb cov kwv tij nkauj muam.
Kev teev Ntuj yog hauj lwm tseem ceeb hauv lub caij Plaub Caug vim tias ‘kev txhaum’ ua kom neeg khiav deb ntawm Tswv Ntuj, thiab rhuav Tswv Ntuj tus duab hauv neeg mus. Yog li mas kev teev Ntuj thiaj yog rov tsim kev khaub zig Tswv Ntuj dua.
Nyob hauv caij Plaub Caug, lub Koom Txoos thiaj nrhiav cov zaj nyeem pab kom tsoom ntseeg kub siab teev Ntuj thiab ruaj nreb taug Tswv Ntuj txoj kev. Li ntawd, tus neeg ntseeg thiaj yuav tau mus koom lub txoos teev Ntuj thiab txais Leej Pleev lub Cev Ntshiab; tus neeg ntseeg yuav tau mus daws txhaum kom nws tau ntxhua lub siab lub tswv yim kom ntshiab txaus chaws mus koom cav txog Leej Pleev txoj kev Hla; tus neeg ntseeg yuav muab siab rau taug Yes Xus kev txom nyem 14 theem.
Leej Ntshiab Tswv Qhia Pob Zeb Khis Xos Los Kos hais tias “Kab ke yoo yuav nrog kev ua hauj lwm nyiam taug tib txog kev. Kab ke yoo yuav zoo tau tsum muaj lub siab nyiam ua dej yug. Txawm tias koj rho tau lub siab phem tawm hauv koj, tab sis yog koj tsis ywg dej rau txoj hauj lwm sib nyiam kom tawg taus paj, koj kev yoo yuav muaj txiaj ntsim dab tsi tau.” Leej Ntshiab Zam Ncauj Kub kuj hais tias “Thaum peb teev Ntuj mas peb tab tom koom ua ib tug nyob hauv Tswv Ntuj, ces peb lub qhov muag yuav kaj tuaj. Thaum peb pom kev, ces peb lub siab yuav txais kev kaj, peb yuav tau pom Tswv Ntuj, peb lub siab yuav tau dai dhuam rau Tswv Ntuj txhua lub caij, tsis yog thaum peb teev Ntuj xwb…. Peb lub siab yuav nyiam nrhiav Tswv Ntuj thiab nco ntsoov txog Tswv Ntuj mus li, mas peb thiaj yuav muaj lub siab nyiam thiab hnov qab txog Tswv Ntuj nyob hauv peb cov hauj lwm.”
Yog vim li ntawd, nyob hauv caij Plaub Caug, cov neeg ntseeg thiaj yuav coj kab ke yoo, pub thiab ua cov hauj lwm nyiam lwm tus, thiab kub siab teev Ntuj; mas lawv thiaj yuav tsim nyog koom cav txog Leej Pleev kev Hla nyob hauv Hnub Ha.
Lub caij Plaub Caug, mas peb nyeem Tswv Ntuj Lo Lus hauv lub Txoos zoo li no: xyoo ib mas peb yuav nrhiav cov zaj hais txog Cim Ntxuav, xyoo ob mas peb yuav nrhiav cov zaj ntuas kom cov neeg ntseeg koom kev nrog Huab Tais Yes Xus, thiab xyoo peb mas peb yuav nrhiav cov zaj hais txog kev yuav siab tshiab.
Lub Moo Zoo hauv lis piam 1 yog zaj piav txog Huab Tais Yes Xus raug dab phem ntxias nyob hauv teb chaws suab puam; zaj no qhia cov neeg ntseeg kom pom tias Huab Tais Yes Xus yog tus txais yeej dab phem tau thiab nyob rau yav tom ntej Huab Tais Yes Xus kuj yuav tuag txhiv sawv daws hauv kev txhaum. Lub lis piam 2 Ntawv Moo Zoo hais txog Huab Tais Yes Xus lub hwj chim tawm tuaj rau Pob Zeb, Yas Kos, thiab Zam pom nyob saum roob Tas Npos; zaj no tsom kom pom txog Huab Tais Yes Xus lub hwj chim nws yuav tau tom qab sawv hauv cov tub tuag rov los. Hais tau tias lub Moo Zoo hauv lub lis piam 1 thiab 2 yog pab kom cov ntseeg pom tias lawv yuav yeej tau dab phem kev haub ntxias mas yog yoog raws Huab Tais Yes Xus kev txom nyem thiab tus Ntoo Cuam. Yog thaum cov ntseeg taug Huab Tais Yes Xus tus lw mas muaj ib hnub lawv yuav tau koom Huab Tais Yes Xus lub hwj chim.
Nyob hauv lub lis piam 3-5 lub Moo Zoo yuav hais txog txoj kev coj mus cuag lub caij ua Hmoov Hla.
Xyoo ib, lub lis piam 3 hais txog thaum Huab Tais Yes Xus nrog tus poj niam Xas Mas Lias tham (Z 4: 5-42) ces cov neeg hauv Xas Mas Lias cav tias Huab Tais Yes Xus yog tus cawm seej, yog cov dej pub txoj sia rau tus tau haus. Xyoo ib, lub lis piam 4 lub Moo Zoo hais txog Huab Tais Yes Xus kho tus neeg dig muag nruab thiab (Z 9: 1-41). Xyoo ib, lub lis piam 5 yog zaj piav txog Huab Tais Yes Xus tau tsa Las Ntxas Los sawv hauv qhov tuag (Z 11: 1-45) mas Huab Tais Yes Xus hais tias “Kuv yog txoj kev sawv rov los thiab yog txoj sia, tus ntseeg txog kuv tab yog nws tuag lawm, nws yuav muaj txoj sia nyob.”
Sawv daws yuav pom tias lub Moo Zoo hauv lub xyoo ib no qhia rau sawv daws to taub tias kev hloov siab tshiab yog khiav tawm hauv kev txhaum mus nrhiav Ntuj lub txiaj ntsim xws li tus neeg nrhiav dej haus cawm nws txoj sia, kev hloov siab tshiab yog tawm hauv qhov tsaus mus nyob hauv qhov kaj xws li tus dig muag rov pom kev, thiab kev hloov siab tshiab yog tawm hauv qhov tuag mus txais txoj sia tshiab nyob hauv Huab Tais Yes Xus xws li tus neeg tuag sawv rov los.
Nyob hauv xyoo ob, yuav hais txog kev koom nrog Huab Tais Yes Xus hla tus Ntoo Cuam mus txais lub koob meej raws li lub Moo Zoo hauv Zam Ntawv Moo Zoo. Lub lis piam 3 hais txog thaum Huab Tais Yes Xus mus hauv lub Tuam Tsev Teev Ntuj, nws pom cov tub luam ces nws muab lawv ntiab tawm mus (Z 2: 13-25), lub lis piam 4 yog Nis Kos Des Mos tuaj nrog Huab Tais Yes Xus tham (Z 3: 14-21), ces Huab Tais Yes Xus hais txog nws txoj kev tuag nyob saum tus Ntoo Cuam, kom tau hliv nws lub txiaj ntsim pub rau sawv daws thiab ua lub cim cav txog Tswv Ntuj kev nyiam ntiaj teb neeg. Thaum Leej Pleev tus Ntoo Cuam raug tsa siab thiab tsoom ntseeg yuav pe hawm Leej Pleev nyob saum tus Ntoo Cuam no tas siab tas ntsws. Peb pom qhov no tau yog nyob hauv Hnub Rau Ntshiab thiab peb yuav nco ntsoov txog thaum peb ua Ntoo Cuam lub cim.
Lub Moo Zoo hauv lub lis piam 5 yog Zam Ntawv Moo Zoo (Z 12: 20-33) hais txog thaum Huab Tais Yes Xus hais tias “Txog lub sij hawm uas Neeg Leej Tub yuav txais koob meej. Kuv hais qhov muaj tseeb tiag rau nej; yog lub noob nplej uas poob rau hauv av tsis tuag, mas nws nyob nws ua ib lub noob twm zeej. Hos yog nws tuag, mas nws txi txiv ntau.” Pom tau tias Huab Tais Yes Xus kev tuag yog kev txais lub koob meej vim nws tau tuag txhiv ntiaj teb neeg, nws coj lub txiaj ntsim tuaj rau sawv daws. Yog li cov ntseeg thiaj tso siab tau tias thaum lawv ua neej nyob hauv kev sis nyiam sis hlub, thiab sib pab mas lawv yuav txais koob haum xws li Huab Tais Yes Xus txais nws lub koob meej.
Xyoo peb, lub lis piam 3 yog thaum cov neeg nug Huab Tais Yes Xus txog cov Nkas Lis Lais raug Pis Las Tos tua thiab cov raug tus pej thuam Xis Los Es vau los tsuam, ces Huab Tais Yes Xus teb rau lawv tias “Yog nej tsis xav tig dua los hloov siab tshiab, mas nej yuav tuag ib yam li ntawd thiab” (LK 13: 1-9). Zaj no yog Huab Tais Yes Xus ntuas peb kom muab siab rau hloov siab tshiab, muab siab rau tso kev txhaum pov tseg, tsis yog yuav niaj hnub txiav txim rau lwm tus.
Lub lis piam 4 yuav hais txog tus tub loj leeb rov los nrhiav leej txiv (LK 15: 1-3, 11-32), yog zaj paj lug qhia sawv daws tias yuav hloov siab tshiab zoo li cas, yog li nyob hauv lub caij Plaub Caug, thiaj yog lub caij cia rau sawv daws hloov siab tshiab mas thiaj yuav rov mus cuag lub tsev ntshiab saum Ntuj Ceeb Tsheej tau. Thaum ntawd, Tswv Ntuj yuav ua rooj qav txais tos tus hloov siab tshiab vim Tswv Ntuj hais tias “Kuv tus me nyuam no tuag lawm, zaum no nws ciaj rov los; nws ploj lawm, nyem no nrhiav tau nws rov los.”
Lub lis piam 5 yuav hloov los nyeem cov lus hauv Zam Ntawv Moo Zoo (Z 8: 1-11) piav txog thaum cov Fas Lis Xais coj tus poj niam deev hluas tuaj cuag Huab Tais Yes Xus. Zaj no yuav hais txog kev zam txim nqua hu kom peb hloov siab tshiab thiab ua hauj lwm them txim raws li lo lus Huab Tais Yes Xus hais tias “Koj rov mus, txij no mus koj txhob ua txhaum ntxiv lawm mog.”
Xyoo no yog xyoo ob; lub Moo Zoo nej yuav tau mloog thiaj yog cov lus Huab Tais Yes Xus hais qhia kom cov neeg ntseeg sawv daws tso siab tias yog lawv ua neej nyob hauv kev sis nyiam sis hlub, thiab sib pab mas lawv yuav txais koob haum loj nyob saum ntuj.
