ZAJ NYEEM NIAJAHNUB. Tim 24 lub 11 hli 2022 (Daily reflection)

ZAJ NYEEM HNUB TIM 24 LUB 11 HLIS, HNUB NCO TXOG COV LEEJ NTSHIAB COB TSIB
COV LUS NYOB HAUV LUS KAS NTAWV MOO ZOO (LK 21: 20-28)

Kwv tij Hmoob, lub Moo Zoo hnub no yog Huab Tais Yes Xus hais txog lub zim txwv kawg, yog lub caij Huab Tais Yes Xus yuav rov los. Huab Tais Yes Xus los zaum no mas tsis yog los cawm ntiaj teb neeg lawm, tab sis yog los txiav txim rau ntiaj teb neeg raws li lawv cov hauj lwm tau ua thaum nyob hauv lub sim ceeb. 
Cov kwv tij, peb pom tias niaj hnub no yeej muaj tej xwv txheej zoo li Huab Tais Yes Xus hais tiag, tab sis peb tsis paub tseeb tias puas yuav yog lub caij kawg, tej zaum yog hnub no, lis piam no, lub hli no, xyoo no, los xyoo tom ntej; yeej tsis yuav muaj leej twg paub tau. Yog li mas yam peb yuav npaj tseg cia tos txais Huab Tais Yes Xus rov los mas yog kav tsij ua zoo rau lwm tus, kav tsij sib nyiam sib hlub raws li Huab Tais Yes Xus qhia rau peb. Peb haiv Hmoob hais tias ‘tsim koob hmoov’. 
Kev tsim koob hmoov mas koj tsuas tsim tau rau koj xwb, koj yuav tsim pub rau lwm tus tsis tau. Tus yuav pub tau rau lwm tus mas kawg Tswv Ntuj tib tug xwb. Li ntawd mas kwv tij Hmoob sawv daws, peb ua neej nyob mas peb kav tsij ua lub neej raws Huab Tais Yes Xus lub Moo Zoo mog, vim lub Moo Zoo yog yam qhia rau peb kom txawj ua cov hauj lwm zoo xis Tswv Ntuj siab, thiab peb yuav thov Leej Txiv Tswv Ntuj niaj hnub foom hmoov zoo rau peb kom txawj ua xis Tswv Ntuj siab, thiab peb yuav thov Tswv Ntuj pab lwm tus, kom lawv tau txais Ntuj lub txiaj ntsim, tau txais Leej Pleev txoj kev cawm. Nyob zoo sawv daws. 
 

Add new comment

1 + 0 =