ZAJ NYEEM NIAJAHNUB. Tim 17 lub 11 hlis 2022 (Daily reflection)

ZAJ NYEEM HNUB TIM 17 LUB 11 HLIS, HNUB NCO TXOG LEEJ NTSHIAB ES LIS XAS NPES NYOB HOOS QIAS
COV LUS NYOB HAUV LUS KAS NTAWV MOO ZOO (LK 19: 41-44)

Cov kwv tij Hmoob, thaum Huab Tais Yes Xus pom lub tsheej Yes Lus Xas Les, ces Huab Tais Yes Xus quaj vim Huab Tais Yes Xus paub zoo tias muaj ib hnub lub tsheej Yes Los Xas Les yuav raug kev puas tsuaj. Raws li peb paub nyob hauv cov Yus Das liv xwm, mas xyoo 70 cov Yus Das koom siab tawm tsam cov Los Mas, ces cov Los Mas thiaj xa tus rog tuaj voj lub tsheej thiab rhua lub tsheej pov tseg. 
Cov kwv tij, yog tias cov Yus Das lawv txhob ib siab rau ntiaj teb lub hwj chim, lawv tig los nrhiav kev thaj yeeb nyob hauv Tswv Ntuj raws li Huab Tais Yes Xus tau qhia lawv, mas cov xwm no yuav tsis raug lawv.
Thaum Huab Tais Yes Xus pom li no, nws thiaj quaj kua muag nrog tias ua cas neeg thiaj tsis xaiv taug txoj kev coj mus cuag kev thaj yeeb.
Kwv tij Hmoob sawv daws, niaj hnub no peb pom tias lub ntiaj teb tab tom taug cov Yus Das tus lw, lawv xaiv kev tsov rog ua ntej kev thaj yeeb. Peb yuav sib koom siab thov Tswv Ntuj tso Leej Ntuj Plig Ntshiab los tshoj cov thawj coj, los qhib lawv qhov muag, ntxeev lawv siab kom tso tseg kev tsov rog, tig los sib tuav test sim kev thaj yeeb rau lub ntiaj teb. 

Add new comment

2 + 3 =