ZAJ NYEEM NIAJ HNUB. Tim 26 lub 9 hli 2022 (Daily reflection)

ZAJ NYEEM HNUB TIM 26 LUB 9 HLIS, NCO TXOG LEEJ NTSHIAB KOS SAWS MAS THIAB DAS MIS AS
COV LUS NYOB HAUV LUS KAS NTAWV MOO ZOO (LK 9: 46-50)

Kwv tij Hmoob sawv daws, lub Moo Zoo hnub no mas yog thaum cov thwj tim xav tias Huab Tais Yes Xus txoj hauj lwm mas yog yuav coj tsoom pej xeem sawv tawm tsam cov vaj Los Mas, ces cov His Xas Lais yuav tau txais kev twj lij, lawv yuav muaj ib lub teb chaws, Huab Tais Yes Xus yuav sawv ua cov Yus Das tus vaj, ces lawv thiaj sib tham tias yog thaum Huab Tais Yes Xus sawv ua vaj lawm, mas nyob hauv lawv pab Kaum Ob, leej twg yuav yog tus loj dua cov, leej twg yuav sawv nyob ntawm Huab Tais Yes Xus sab laug thiab sab xis.
Huab Tais Yes Xus paub tias lawv tab tom yuam kev loj, nws thiaj rub ib tug me nyuam los nyob ze ze ntawm nws xub ntiag thiab hais qhia rau pab Kaum Ob tias tus yuav tau ua tus loj yog tus me me zoo xws li tus me nyuam no.
Kwv tij Hmoob sawv daws, cov me nyuam mas lawv lub tswv yim ntshiab, lawv zoo xws li daim ntaub dawb, lawv zoo siab los nrhiav Huab Tais Yes Xus, mloog Huab Tais Yes Xus hais lus rau lawv, yog li Huab Tais Yes Xus thiaj xav qhia rau cov thwj tim kom lawv ua xws li cov me nyuam.
Kwv tij Hmoob, nyob hauv peb mas peb yuav ua zoo li ntawd, peb yuav ua zoo li tus me nyuam nyiam mloog leej txiv lus, ua raws li leej txiv hais. Nyob zoo sawv daws.