ZAJ NYEEM NIAJ HNUB. Tim 23 lub 9 hli 2022 (Daily reflection)

ZAJ NYEEM HNUB TIM 23 LUB 9 HLIS, NCO TXOG LEEJ NTSHIAB NPIS YAUS
COV LUS NYOB HAUV LUS KAS NTAWV MOO ZOO (LK 9: 18-22)

Kwv tij Hmoob, lub Moo Zoo hnub no mas yog thaum Huab Tais Yes Xus xav paub tias cov thwj tim xav li cas txog nws, ces nws thiaj nug lawv tias raws li lawv xav mas Huab Tais Yes Xus yog leej twg, ces Pob Zeb thiaj teb tias ‘Huab Tais Yes Xus yog Tswv Ntuj tus Pleev.’ Txhais tias Pob Zeb lees tias Huab Tais Yes Xus yog tus Tswv Ntuj xaiv los cawm cov His Xas Lais, los peb hais tias tus ‘Mes Xias’. 
Kwv tij Hmoob, Huab Tais Yes Xus yeej yog tus yuav los cawm cov His Xais Lais thiab qab ntuj neeg tiag, mas Huab Tais Yes Xus thiaj tsis hais dab tsi ntxiv, tsuas txwv tsis pub lawv hais tej no rau lwm tus paub xwb. 
Ua cas Huab Tais Yes Xus thiaj txwv cov thaj tim? Vim tias yog lawv hais ntau rau luag tej paub, mas ntshai Huab Tais Yes Xus txoj hauj lwm cawm ntiaj teb neeg saum Ntoo Cuam yuav tsis tsheej xeeb tau, ntshai lawv yuav tsis pom Huab Tais Yes Xus tuag thiab sawv rov los.
Huab Tais Yes Xus xav kom nws cov thwj tim tau pom tej xwm yuav tshwm tuaj, mas lawv txoj kev ntseeg thiaj ruaj dua qhov lawv hais tawm ntawm ncauj los.
Kwv tij Hmoob sawv daws, peb tsis pom Huab Tais Yes Xus cov hauj lwm, peb tsis pom Huab Tais Yes Xus tuag thiab sawv rov los, tab sis peb tau cov lus zeem tseeb ntawm cov thwj tim, mas hnub no peb yuav coj los xav, saib peb hais tias ‘Huab Tais Yes Xus yog leej twg?’ Nyob zoo sawv daws.