ZAJ NYEEM NIAJ HNUB. Tim 17 lub 10 hli 2022 (Daily reflection)

ZAJ NYEEM HNUB TIM 17 LUB 10 HLI, NCO TXOG LEEJ NTSHIAB IS NYAS XYUS NYOB AS NTHIAS KIAS
COV LUS NYOB HAUV LUS KAS NTAWV MOO ZOO (LK 12: 13-21)

Kwv tij Hmoob sawv daws, nej hnov Huab Tais Yes Xus hais zaj paj lug no tas, nej xav li cas? Raws li kuv xav mas Huab Tais Yes Xus tab tom ntuas peb tias txhua yam peb nrhiav tau los peb muaj nyob hauv lub ntiaj teb no, yog Tswv Ntuj pub rau peb coj mus ua kom muaj txiaj ntsim rau lwm tus raws lo lus thaum Tswv Ntuj hais rau tus neeg nplua nuj hauv zaj paj lug no tias “Tus uas khaws nyiaj txiag tseg rau nws tib leeg kheej, mas thaum nws txoj sia tu nws yuav tsis muaj dab tsi li, vim nws tsis nrhiav kev nplua nuj nyob hauv Tswv Ntuj.” 
Yog li mas cov kwv tij Hmoob, thaum peb tsis muaj los tsis ua cas tab sis thaum peb muaj lawm, s tsim nyog peb yuav tau qee pub rau lwm tus, pab cov neeg muaj tsawg dua peb xws li tus muaj nyiaj yuav txawj qee nws cov nyiaj pub rau tus txom nyem, tus muaj txhiam laj txhiam xws yuav faib rau tus tshaib plab tau noj, tus muaj lub tswv yim ntse yuav pab ntaus tswv yim rau tus ruam, tus muaj lub zog loj yuav tawm zog pab cov neeg lub zog me, tus txawj yuav pab tus tsis paub qab hau.
Kwv tij Hmoob, nej ua li hais mas thiaj yog nej tau tsim kev nplua nuj nyob hauv Tswv Ntuj mog! Nyob zoo sawv daws.