ZAJ NYEEM NIAJ HNUB. Tim 15 lub 7 hli 2022 (Daily reflection)

ZAJ NYEEM HNUB TIM 15 LUB 7 HLI, NCO TXOG LEEJ NTSHIAB NPOS NAS VEES TUS LAS
COV LUS NYO B HAUV MAS TAIS NTAWV MOO ZOO (MT 12: 1-8)

Kwv tij Hmoob, Huab Tais Yes Xus hais tias qhov Tswv Ntuj xav yuav mas yog kev khuv leej tsis yog tej thaj txi Ntuj. 
Cov kwv tij, tej thaj txi Ntuj uas Huab Tais Yes Xus hais txog no tsis yog thaj txi Ntuj uas niaj hnub no peb cov ntseeg mus koom nyob hauv tsev teev Ntuj.
Thaj txi Ntuj Huab Tais Yes Xus hais txog no, mas yog cov Yus Das kab ke muab tsiaj tua lo txi rau Ntuj, xws li peb Hmoob tej kab ke laig dab thiab pauj yeem.
Tos Huab Tais Yes Xus hais li no, vim nyob hauv cov Yus Das txoj cai mas hnub Xas Npas Tos, cov Yus Das yuav tau muas tej tus yaj los tshis mus cia rau cov leej choj muab tua txi Ntuj them lawv cov txim txhaum, ces tus neeg muaj los pluag mas yuav tsum tau ua zoo xws tib yam.
Lawv tsis saib tias tus neeg ntawd puas muaj nyiaj los muaj tej tus tsiaj txaus cia txi Ntuj, lawv tsis quav ntsej txog cov pej xeem kev txom nyem. Muaj tej tus mas lawv lam tuaj ua kom tas txoj cai, vim lawv xav tias yog lawv muab tej tsiaj tua txi Ntuj tas mas lawv cov txhaum yuav daws tas.
Kwv tij Hmoob sawv daws, niaj hnub no mas muaj peb coob tus yeej xav zoo li ntawd thiab tiag, peb lam ua zoo, lam pub rau lwm tus kom tag cai, lam pub rau lwm tus kom luag pom tias peb yog neej siab dav, peb lam mus teev Ntuj kom luag pom tias peb muaj lub siab ntseeg, thiab peb xav tias peb mus koom teev Ntuj ces peb yuav tau txais kev cawm.
Tsis yog li peb xav mog!
Tswv Ntuj tsis saib tej yam peb tau ua rau lwm tus pom, yam Tswv Ntuj saib mas yog peb lub siab. Tswv Ntuj saib tias thaum peb pub rau lwm tus, peb puas muaj lub siab hlub luag tiag; thaum peb pab lwm tus, peb lub siab puas khuv leej lawv; thaum peb teev Ntuj puas yog peb teev tawm hauv peb siab los; thaum peb sib sau ua lub txoo txi Ntuj mas peb puas tau cev tas peb lub siab lub plawv nrog Huab Tais Yes Xus ua cov txim rau Tswv Ntuj.
Kwv tij Hmoob sawv daws, nej coj cov lus no mus ntsuas nyob hauv nej lub siab mog!
 

Add new comment

1 + 0 =