ZAJ NYEEM NIAJ HNUB. Tim 14 lub 9 hli 2022 (Daily reflection)

ZAJ NYEEM HNUB TIM 14 LUB 9 HLIS, HNUB UA HMOOV TSA TUS NTOO CUAM NTSHIAB
COV LUS NYOB HAUV ZAM NTAWV MOO ZOO (Z 3: 13-17)

Kwv tij Hmoob sawv daws, lub Moo Zoo nej mloog hauv hnub no mas yog thaum Huab Tais Yes Xus qhia txog kev yug dua tshiab rau tus Fas Lis Xais hu ua Nis Kos Des Mos. Huab Tais Yes Xus hais qhia rau nws tias nws yuav raug ntsia saum Ntoo Cuam xws li thaum Mais Xes tsa tus nab nyob teb chaws suab puam. Vim cov His Xas Lais cov txhaum mas lawv thiaj raug nab muaj taug tom, Tswv Ntuj thiaj qhia kom Mais Xes ua tus nab rau saum tus ntoo, yog leej twg ntsia tus nab mas nws yuav tsis tuag. Hos nyob rau Huab Tais Yes Xus lub caij mas nws yuav raug ntsia nyob saum tus Ntoo Cuam, yog tus twg pom Huab Tais Yes Xus dai saum Ntoo Cuam thiab nws ntseeg mas nws yuav tau txoj sia nyob mus li. Yam no yog kev yug dua tshiab.
Kwv tij Hmoob, niaj hnub thaum sawv los, mas xav kom nej ntsia tus Ntoo Cuam nej coj ntawm caj dab, nej yuav pom tias Huab Tais Yes Xus raug dai nyob ntawd tiag, vim nws nyiam peb mas nws thiaj yeem raug dai zoo li ntawd, kom xwv peb tau yug dua tshiab ua Tswv Ntuj cov me nyuam, kom peb tau txais txoj sia tshiab, peb yuav ua Huab Tais Yes Xus tsaug thiab yuav coj lub neej tshiab hauv hnub no kom ntshiab mog. Nyob zoo sawv daws.
 

Add new comment

1 + 4 =