ZAJ NYEEM NIAJ HNUB. Tim 14 lub 5 hlis 2022 (Daily reflection)

HNUB TIM 14 LUB 5 HLIS, HWM LEEJ NTSHIAB MAS THIAS

Kwv tij Hmoob sawv daws, hnub no lub Koom Txoos hwm Leej Ntshiab Mas Thias. Leej Ntshiab Mas Thias yog tus uas cov thwj tim xaiv los tam Yus Das Kas Lis Yaus chaw ua tus Hauv Paus Xa Lus.

Leej Ntshiab Mas Thias yeej ib txwm nrog nraim Huab Tais Yes Xus, nws tau pom Huab Tais Yes Xus ua hauj lwm pab lwm tus thiab tau pom Huab Tais Yes Xus sawv rov los. Nws coj nraim Huab Tais Yes Xus cov lus qhia kom sis nyiam sis hlub, ces nws thiaj kub siab tawm mus tshaj txog Yes Xus rau Yus Das teb, Kas Pas Dos Xias, Hais Nkws Tos thiab Es Thias Pias.

Leej Ntshiab Mas Thias tshaj lub Moo Zoo txog 30 xyoo ces nws raug cov neeg siab phem txawb pob zeb tuag.

Kwv tij Hmoob sawv daws, vim txoj kev nyiam lwm tus loj dua nws rov nyiam nws txoj sia, mas Leej Ntshiab Mas Thias thiaj yeem tuag kom tau ua tim khawv txog lub Moo Zoo, ces peb thiaj ntseeg tias Huab Tais Yes Xus tau txais nws mus so nyob nrog Huab Tais Yes Xus lawm tiag, nws tau ua Huab Tais Yes Xus tus tseem phooj ywg lawm.

Nyob hauv peb, mas peb yuav xyaum yoog cov Leej Ntshiab tus yam ntxawv, yog sis nyiam sis hlub xws li Huab Tais Yes Xus tau hais rau peb.

Nyob zoo sawv daws.

 

Add new comment

8 + 6 =