ZAJ NYEEM NIAJ HNUB. Tim 14 lub 10 hli 2022 (Daily reflection)

ZAJ NYEEM HNUB TIM 14 LUB 10 HLI, HNUB NCO TXOG LEEJ NTSHIAB VAJ QHIA KAS LIS TUS 1
COV LUS NYOB HAUV LUS KAS NTAWV MOO ZOO (LK 12: 1-7)

Kwv tij Hmoob sawv daws, lub Moo Zoo hnub no mas Huab Tais Yes Xus xav ntuas peb kom txhob ntshai tshaj lub Moo Zoo rau lwm tus, txhob ntshai ua tim khawv txog txoj kev ntseeg Ntuj rau nej cov kwv tij. 
Kev tshaj lub Moo Zoo tsis yog cov Leej Choj, cov Phauj los yog cov Xib Hwb txoj kab xwm. Kev tshaj lub Moo Zoo yog cov neeg ntseeg sawv daws txoj hauj lwm yuav tau sib pab.
Kev tshaj lub Moo Zoo tsis yog kom peb piav los tham txog Tswv Ntuj rau lwm tus, tsis yog kom peb qhia lawv txog kev ntseeg xwb. Yog tias peb ua ib tug piv txwv zoo, peb ua neej nyob txawj nyiam txawj hlub lwm tus, txawj pab cov neeg txom nyem dua peb, peb hais lus luag ntxhi rau lwm tus, tsis chim tsis npau taws rau tus neeg ua phem rau peb, tej no puav leej yog kev tshaj lub Moo Zoo tib si.
Kwv tij Hmoob sawv daws, vam tias nej yuav sib pab tshaj lub Moo Zoo rau nej cov txheeb ze, rau cov nyob hauv nej zos mog.
Nyob zoo sawv daws.