ZAJ NYEEM NIAJ HNUB. Tim 13 lub 10 hli 2022 (Daily reflection)

ZAJ NYEEM HNUB TIM 13 LUB 10 HLI, HNUB TSIB LUB LIS PIAM 28 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 11: 47-54)

Kwv tij Hmoob sawv daws, nyob hauv cov Yus Das li liv xwm, mas lawv muaj ib co neeg sawv los ua yaj saub. Cov yaj saub yog cov coj Tswv Ntuj Lo Lus los qhia los ntuas cov Yus Das kom ua neej nyob hauv Tswv Ntuj txoj kev. Cov Yus Das tsis yog tsis mloog xwb, lawv tseem muab cov yaj saub tua thiab. Yog li Huab Tais Yes Xus thiaj hais tias cov Yus Das yuav tsum ris lub txim lawv cov yawg koob tau muab cov yaj saub tua li ntawd.
Txog Huab Tais Yes Xus tiam mas raws li peb paub, cov Yus Das kuj tau hiam Huab Tais Yes Xus thiab coj Huab Tais Yes Xus mus tua nyob saum tus Ntoo Cuam. Lawv tau ua txhaum loj tiam sis vim Huab Tais Yes Xus kev tuag mas tas lub ntiaj teb thiaj tau kev cawm, tau kev rov los cuag Tswv Ntuj.
Yog li mas peb cov neeg ntseeg yuav sib pab thov Ntuj pub rau cov Yus Das, thov kom Tswv Ntuj zam lub txim rau lawv, thov Tswv Ntuj qhib lawv lub qhov muag kom pom tias tus lawv muab tua saum Ntoo Cuam yog tus Mes Xias lawv tos, thov Leej Ntuj Plig Ntshiab qhib lawv lub siab kom tig los ntseeg txog Yes Xus, los lees Yes Xus ua lawv tus Huab Tais, lees tias Yes Xus yog Tswv Ntuj Leej Tub tus cawm lawv thiab cawm lub qab ntuj neeg.
Nyob zoo sawv daws.