ZAJ NYEEM NIAJ HNUB. Tim 12 lub 9 hli 2022 (Daily reflection)

ZAJ NYEEM HNUB TIM 12 LUB 9 HLIS, NIAM MAB LIAB LUB NPE NTSHIAB
COV LUS NYOB HAUV LUS KAS NTAWV MOO ZOO (LK 7: 1-10)

Kwv tij Hmoob, nyob hauv Yes Xus tiam neeg mas cov Yus Das ntxub cov Los Mas heev, vim tias cov Los Mas yog cov pej kum neeg tuaj tswj, tuaj kav cov Yus Das lub teb chaws, cov Los Mas yog cov neeg teev paj kum dab thiab yog cov neeg tsis huv. 
Nyob hauv Ntawv Moo Zoo hnub no peb pom tias tus xab txheeb Los Mas cia ib co neeg tuaj nrhiav Huab Tais Yes Xus, nws ua neeg me, nws tsis saib tias nws lub tsim lub meej mom loj dua Huab Tais Yes Xus lub, nws tsis siv nws lub hwj chim los yuam Huab Tais Yes Xus kom mus kho nws tus tub txib. 
Txawm muaj 2 yam loj tshaj peb pom hauv zaj no, yog qhov tias tus xab txheeb Los Mas no, nws nyiam nws tus tub txib; thiab nws muaj lub siab ntseeg tias Huab Tais Yes Xus muaj peev xwm kho tau tus tub txib.
Ua cas peb hais tias nws nyiam nws tus tub txib, vim tias nyob rau lub ntuj txheej thaud, cov neeg Los Mas saib cov tub txib zoo xws li yog lawv cov tsiaj, tsis muaj tsim loj cuag li ib tug neeg.
Peb paub tau li cas tias nws muaj lub siab ntseeg, kuj yog vim nws cov lus hais tias “Kuv tsis tsim nyog koj chaws los hauv kuv lub tsev, thiab kuv saib kuv tsis tsim nyog tuaj cuag koj. Tab sis koj hais ib lo lus kom kuv tus tub txib zoo hlo.”
Vim 2 yam no mas Huab Tais Yes Xus thiaj hais tias “Nyob hauv tsoom His Xas Lais, kuv tsis tau pom ib lub siab ntseeg npaum li no.”
Yog li mas kwv tij Hmoob sawv daws, peb yuav kawm ntawm tus xab txheeb no; peb yuav tsis txaj muag ua raws yam peb ntseeg; peb yuav ua neeg me, nyiam lwm tus, ntseeg ruaj nreb; peb yuav tso siab thiab vam khom txog cov lus peb thov Huab Tais Yes Xus pab. Nyob zoo sawv daws.
 

Add new comment

4 + 0 =