ZAJ NYEEM NIAJ HNUB. Tim 11 lub 10 hli 2022 (Daily reflection)

ZAJ NYEEM HNUB TIM 11 LUB 10 HLI, HNUB NCO TXOG LEEJ NTSHIAB VAJ QHIA ZAM PAJ LUG 23
COV LUS NYOB HAUV LUS KAS NTAWV MOO ZOO (LK 11: 37-41)

Cov kwv tij Hmoob, hnub no Huab Tais Yes Xus hais ib lo lus tias ‘tus tsim sab nraud, nws tsis ua kom muaj sab hauv thiab lod?’ txhais tias thaum Tswv Ntuj tsim neeg mas Tswv Ntuj tsim neeg lub cev nrog rau neeg lub siab tib si. Li ntawd, thaum peb ua ib yam dab tsi mas peb tsum saib txog sab hauv neeg lub siab thiab, peb ua ib yam dab tsi mas peb yuav nco txog yam ntawd lub ntsiab thiab.
Piv txwv tias thaum peb noj mov, peb yuav nco txog lub ntsiab tias mov yog yug neeg lub plab kom txau, yug neeg lub cev kom rov muaj zog, yog li mas peb yuav tau faib peb li mov pub rau tus neeg tshaib tau noj, kom nws txhob tshaib, kom nws rov muaj zog li peb.
Yog peb ua li no mas thiaj phim rau Huab Tais Yes Xus lo lus hauv hnub no tias “phim nej yuav muab yam nej muaj pub rau luag, ces txhua yam yuav huv rau nej.”
Nyob zoo sawv daws.