Zaj nyeem hnub tim 6 lub 2 hlis 2023 (Daily reflection)

ZAJ NYEEM HNUB TIM 6 LUB 2 HLIS, HNUB NCO TXOG LEEJ NTSHIAB PAJ LUG MIB KIM THIAB COV TIM KHAWV ZIS PEES
COV LUS NYOB HAUV MAS KOS NTAWV MOO ZOO (MK 6: 53-56)

Kwv tij Hmoob sawv daws, lub Moo Zoo hnub no hais tias tsoom sid lawv nrhiav Huab Tais Yes Xus, thaum lawv pom mas lawv mus kwv cov neeg mob tuaj rau Huab Tais Yes Xus, kom cov neeg mob tau kov nws tej tw tsho.
Cov kwv tij, cov neeg mob ntawd lawv rov zoo tau li cas?
Lawv zoo vim tias lawv muaj lub siab ntseeg, lub siab ntseeg hloov ua lub zog rau lawv, ces lawv rov khees tuaj, lawv rov muaj zog dua tuaj.
Thaum kev ntseeg ua hauj lwm nyob hauv tus neeg muaj mob, tus ntawd qhov mob yuav ntaug vim lawv qhov mob yog mob sab ntsuj plig.
Kwv tij, yog muab hais kom peb to taub yooj yim, mas thov muab piv rau peb tej kev ua neeb hu plig. Ua cas thaum ib tug neeg mob mob, peb cov kwv tij Hmoob coj qub kev cai ua neeb kho los yog hu plig rau tas, ua cas tus mob rov khees tuaj. Txoj kev ntseeg ua kom tus neeg dim ntawm nws kev mob yog zoo li ntawd.
Kwv tij, kev mob cev nqaij, ntsuj plig tsuas yog kev mob ib ntsis xwv, kev mob tiag mas yog kev txhaum. Yog peb tsis hloov siab tshiab, tso kev ua txhaum pov tseg tsis hais lub tswv yim xav tsis zoo, lub siab xav phem, lub ncauj hais lus dev, lub cev ua qhov qias; mas txawm peb cev nqaij thiab ntsuj plig rov zoo lawm los, peb yuav rov mob ntxiv tau.
Kwv tij Hmoob sawv daws, thaum Huab Tais Yes Xus kho peb qhov mob sab ntsuj plig lawm, peb yuav tau kho peb tus plig thiab mog.
Nyob zoo sawv daws.