Zaj nyeem hnub tim 30 lub 3 hlis 2023 (Daily reflection)

ZAJ NYEEM HNUB TIM 30 LUB 3 HLIS, HNUB TSIB LUB LIS PIAM 5 CAIJ PLAUB CAUG
COV LUS NYOB HAUV ZAM NTAWV MOO ZOO (Z 8: 51-59)

Cov kwv tij, Ntawv Moo Zoo nej hnov mas Huab Tais Yes Xus hais tias “Kuv hais qhov muaj tseeb tiag rau nej; leej twg khaws kuv lo lus, nws tsis saj txoj kev tuag ib zaug. Kuv hais qhov muaj tseeb tiag rau nej tias; thaum Has Nplas Has tsis tau yug, kuv yeej nyob lawm.”
Huab Tais Yes Xus lo lus no yog kom peb tso siab rau peb txoj kev ntseeg txog Yes Xus.
Huab Tais Yes Xus lo lus no tsis yog tias thaum peb ua raws lawm, mas leej twg yuav tua tsis tau peb, los yog peb yuav ua neej nyob hauv lub ntiaj teb no mus tas ib txhis. Tab sis Huab Tais Yes Xus tab tom qhia peb tias nws yeej ib txwm nyob ua ntej Leej Txiv yuav tsim lub sim ceeb lawm, yog peb mloog nws thiab peb ua raws nws cov lus, mas peb yuav tsis tuag hauv sab ntsuj plig, los yog peb yuav tau txoj sia nyob mus li, tom qab peb tso lub ntiaj teb no tseg.
Kwv tij, nej sim saib Huab Tais Yes Xus cov thwj tim, lawv yog cov mloog thiab ua raws li lo lus, lawv twb tuag tau ob txhiab tawm xyoo lawm tiag, tab sis niaj hnub no, lawv tseem muaj txoj sia nyob zoo li thaud, lawv tseem niaj hnub ua lawv cov hauj lwm tshaj lub Moo Zoo rau ntiaj teb neeg. Lawv lub cev mus ua av lawm tiag, tab sis lawv cov hauj lwm, lawv tus plig tseem nyob nraim.
Kwv tij Hmoob sawv daws, hnub no peb yog Huab Tais Yes Xus thwj tim lawm, peb yuav muab Huab Tais Yes Xus saib ua lub plawv hauv peb txoj kev ntseeg, peb yuav muab Huab Tais Yes Xus ua qhov tseem ceeb hauv peb txoj sia. Peb yuav xyaum yoog Huab Tais Yes Xus tus piv txwv, peb yuav ua raws
Huab Tais Yes Xus cov lus qhia, kom muaj ib hnub peb tau txais txoj sia nyob mus li nrog peb tus Huab Tais.
Nyob zoo sawv daws.