NTHUAV NTAWV MOO ZOO HNUB TIM 9/1/2020

Lis piam 2 Caij Yes Xus Yug Los.

Yes Xus tshaj lub Moo Zoo nyob Nkas Lis Lais. (LK 4 : 14-22)
Yes Xus rov mus Nkas Lis Lais, nws muaj Leej Ntuj Plig lub zog puv hauv nws. Nws lub moo nto lug mus puv ib cheeb tsam cov zej zog. Nws qhia tsoom sid hauv cov tsev txoos, tas sawv daws qhuas nws.

 Yes Xus los txog Nas Xas Les, yog lub zos uas nws hlob. Hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv. Lawv cev tus Yaj Saub His Xais phau ntawv rau nws. Nws nthuav kauj ntawv, nws nrhiav tau nqe lus uas sau tias : Huab Tais lub Tswv Yim nyob saum kuv, vim nws pleev roj los qee kuv.. Nws xa kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij, kom kuv tshaj tias yog xyoo Huab Tais yuav pub txiaj ntsim.
Yes Xus rov kauv phau ntawv, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. Ces Yes Xus hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov."
Tas cov neeg ntawd zeem tseeb tias nws hais lus zoo, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?"

Kwv tij sawv daws, Huab Tais Tswv Ntuj lub tswv yim, nyob nrog nraim tus uas nws tau xaiv los pleev roj rau. Kom tau ua Tswv Ntuj lub luag hauj lwm thiab txoj kev zoo siab mus rau ib zeej tsoom neeg sawv daws.
Thaum Leej Pleev tau tshaj Tswv Ntuj lub Moo Zoo tuaj txog ib zeej tsoom neeg sawv daws, nws pom cev neeg txom nyem, tsis hais sab nqaij txha los yog siab ntsws, nws tau hlub sawv daws. 
Tswv Ntuj lub hwj huam nqes los nyob saum nws, thiab pub kom nws ua tau txhua yam haum lwm tiav. Nws kho tau cov neeg dig muag, cov tuag ceg thiab cov muaj mob nkeeg huv tib si, kom lawv rov zoo hlo, ces lawv rov ntsib kev zoo siab.
Thaum muaj Tswv Ntuj txoj kev hlub ua nws lub zog, ces nws thiaj muaj peev xwm ua tau txhua yam hauj lwm zoo.
Cov phooj ywg sawv daws, yog peb tsis muaj peev xwm nyiam thiab hlub cov neeg nyob ib ncig peb, yam li peb tej kwv tij phooj ywg uas peb qhov muag ntsia pom, mas peb yuav ua cas muaj peev xwm nyiam thiab hlub Tswv Ntuj uas peb qhov muag ntsia tsis pom tau. Yog peb lam lees ntawm lub ncauj tias peb nyiam Tswv Ntuj xwb, mas ntshai yuav tsis muaj nuj nqis dab tsi, vim Tswv Ntuj yog “txoj kev sib nyiam sib hlub,” thiab nws yog tus Tswv hauv kev sib hlub.

Tus nthuav : XH. Xyooj Tuam Lis, Zoo Tswv Zov Yaj

Add new comment

10 + 0 =