NTHUAV NTAWV MOO ZOO HNUB TIM 6/1/2020

CAIJ TOS HUAB TAIS.

Yes Xus rov los Nkas Lis Lais thiab qhia tsoom sid thiab kho sawv daws cov mob. (MT 4 : 12-17, 23-25)

Yes Xus hnov tias luag ntes Zam lawm, ces nws rov mus Nkas Lis Lais. Nws tso Nas Xas Las tseg, nws mus nyob ruaj rau Kas Fas Naus, ntawm ntug dej ntuj, nyob ntawm Ntxas Npus Loos thiab Nes Tas Lis ciam teb. Li ntawd muaj raws li yaj saub His Xais xub hais tias : Ntxas Npus Loos daim av, Nes Tas Lis daim av, kev mus rau dej ntuj, cov teb chaws nyob sab dej Yos Las Das tim ub, cov neeg teev pej kum dab uas nyob Nkas Lis Lais ! Haiv neeg nyob hauv kev tsaus ntuj pom ib qho pom kev cig loj loj kaj cov neeg maub hauv tub tuag lub teb chaws tsaus ntuj, ib qho pom kev ci tawm tuaj lawm. Txij ntawd los, Yes Xus pib ceeb toom hais tias : "Nej hloov siab mog, vim Ntuj lub Ceeb Tsheej los txog ze lawm."
Yes Xus ncig thoob lub xeev Nkas Lis Lais, nws qhia zeej tsoom nyob hauv cov tsev txoos, nws tshaj lub Moo Zoo txog Ntuj lub Ceeb Tsheej. Nws kho tas puas tsav yam mob, tas puas tsav yam txiab nkeeg hauv tsoom pej xeem zoo tas. Nws lub moo nto mus thoob Xis Lias teb. Ces sawv daws coj cov neeg raug txhua hom mob, txhua hom txiab xeeb tuaj rau nws : cov raug dab, cov qaug dab peg, cov tuag tes tuag taw huv si. Nws kho lawv sawv daws zoo tas. Tej pab neeg coob coob pib raws nws : cov neeg ntawd yog cov nyob Nkas Lis Lais, nyob Des Kas Pos Lis, nyob Yes Lus Xas Les, nyob Yus Das teb, thiab cov nyob sab dej Yos Las Das tim ub. 

Add new comment

3 + 8 =