NTHUAV NTAWV MOO ZOO HNUB TIM 5/2/2020

LIS PIAM 4 CAIJ NYOB NRUAB XYOOS.
Mus xyuas Nas Xas Les. (MK 6 : 1 - 6) 
Yes Xus tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab. Hnub Xas Npas Tos, Yes Xus qhia hauv tsev txoos. Muaj neeg coob tuaj mloog, lawv hnov nws cov lus, lawv qhuas, lawv hais tias : "Nws tau tej ntawd qhov twg los ? Lub siab thoob tsib thiab cov hwj huam yees ntxwv loj uas nws ob txhais tes ua, yog leej twg pub rau nws? Tus ntawd tsis yog tus kws ntoo, Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv kwv tij lod ? Hos nws cov muam, tsis yog cov nrog peb nyob ua ke lod ?"
es Xus ua lawv poob siab. Ces Yes Xus hais rau lawv tias : "Ib tug Yaj Saub, tsuas yog nyob hauv lub zos nws hlob, hauv nws cov txheeb ze thiab nws tsev neeg, mas luag thiaj saib nws tsis muaj nqis."
Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo. Nws xav tsis thoob txog qhov lawv tsis ntseeg.

Kwv tij sawv daws, kev ua lub neej raws Yes Xus, peb tsis txhob nrhiav lub meej mom, los yog lub koob meej rau peb tus kheej, peb tsis txhob ntshaw kom luag qhuas peb. Tab sis, peb yuav cev tas nrho peb lub neej rau Tswv Ntuj ua tus saib xyuas, ces Tswv Ntuj yuav pub ntau tshaj rau peb qhov peb xav tau. Tab sis peb yuav tsum tso tas peb tej kev ntshaw ib puas tsav yam hauv lub qab  tuj no tseg. Zoo yam li Huab Tais Yes Xus lo lus tias : "Tus twg xav cawm nws txoj sia, mas nws ua nws txoj sia ploj, hos tus twg plam nws txoj sia vim kuv, thiab vim lub Moo Zoo, mas nws rov cawm tau nws txoj sia." (MK 8 : 35)
Nqe lus no txhais tias, tus yuav tau lub koob meej nyob rau ntawm Tswv Ntuj xub ntiag, mas nws yuav tsis nrhiav lub lub koob meej los rau nws tus kheej, tus yuav tau Tswv Ntuj lub cuab tam los ua nws tug, mas nws yuav tsis nrhiav lub cuab tam nyob rau ntiaj teb no, tiam sis, nws yuav muab nws lub neej thiab txoj sia coj los cev rau Tswv Ntuj, ces Tswv Ntuj yuav txuag nws.

Tus nthuav : XH. Xyooj Tuam Lis, Zoo Tswv Zov Yaj