NTHUAV NTAWV MOO ZOO HNUB TIM 30/1/2020

LIS PIAM 3 CAIJ NYOB NRUAB XYOOS.
Txais Yes Xus cov lus, yuav ci rau luag pom kev. (MK 4 : 21 - 25)
Yes Xus hais rau lawv tias : "Thaum yus taws ib lub teeb nqa los, yus puas muab txawb hauv qab txees los hauv qab txag ? Tsis yog yuav muab txawb saum tus ncej teeb lod ? Vim tsis muaj ib yam zais ntshis cia, uas yuav tsis tshwm rau luag pom, tsis muaj ib yam npog rawv uas yuav tsis tawm los rau luag paub. Leej twg muaj pob ntseg mloog, mas cia nws mloog !"
Ces Yes Xus hais rau lawv tias : “Nej ceev faj txog tej yam uas nej hnov ! Ntuj yuav xuas lub tawb uas nej luj rov los luj rau nej, thiab Ntuj tseem yuav ntxiv rau nej. Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj.”

Kwv tij sawv daws, txhua tsav txhua yam uas peb muaj, txawm yuav muaj ntau muaj tsawv kuj xij, txhua tsav puas yam no yog los ntawm Tswv Ntuj los. Li ntawd peb yuav siv li cas peb yuav ua li cas thiaj muaj txiaj ntsim rau peb lub neej, thiab rau Tswv Ntuj tes dej num. kom luag lwm tus ntsia pom Tswv Ntuj txoj kev zoo nyob rau hauv tes dej num thiab nyob hauv peb cov ntseeg lub neej.
Yog peb ntshaw kom luag ua rau peb li cas, mas peb yuav tsum xub ua rau luag ua ntej. Peb xav kom luag hwm peb, peb yuav tsum xub hwm luag ua ntej, yog peb xav tau koob meej, mas peb yuav tsum txawj pub koob meej rau luag. Thov kom txhua tsav txhua yam peb ua no, yog peb ua  rau peb tus Tswv Ntu muaj koob meej nto moo mus li.

Tus nthuav : XH. Xyooj Tuam Lis, Zoo Tswv Zov Yaj