NTHUAV NTAWV MOO ZOO HNUB TIM 18/1/2020

CAIJ NYOB NRUAB XYOOS.
Yes Xus nrog cov neeg txhaum noj mov. (MK 2 : 13-17)
Yes Xus rov qab tawm mus taug ntug dej ntuj, tas tsoom sid tuaj ntsauv nws, ces nws qhia lawv. Yes Xus mus ntxiv. Nws pom Les Vis, uas yog As Fas Yos tus tub. Les Vis zaum ntawm rooj sau se, ces Yes Xus hais rau Les Vis tias : "Koj los raws kuv."
Les Vis sawv, nws raws Yes Xus mus.
Thaum Yes Xus noj mov hauv Les Vis tsev, mas muaj ib co sau se thiab ib co neeg txhaum coob nrog Yes Xus thiab cov thwj tim noj mov : vim cov sau se thiab cov neeg txhaum coob coob raws Yes Xus. Cov kws Ntawv Ntshiab uas yog togFas Lis Xais pom Yes Xus nrog cov neeg txhaum thiab cov sau se noj mov, lawv hais rau cov thwj tim tias : "Vim li cas nws nrog cov sau se thiab cov neeg txhaum noj mov ?"
Yes Xus hnov, nws hais rau lawv tias : "Tsis yog cov neeg noj qab nyob zoo yuav vam txog kws kho mob, yog cov neeg mob. Kuv tsis tuaj hu cov neeg ncaj, kuv tuaj hu cov neeg txhaum." 

Kwv tij sawv daws, peb sawv daws txhua tus neeg, yeej paub peb tus kheej zoo tias, peb yog neeg txhaum, vim peb txawj ua txhaum. Huab Tais Yes Xus tuaj hu peb kom los raws nws thiab ua nws Thwj Tim, kom peb los koom nrog Huab Tais Yes Xus. Li ntawd, tsim nyog peb yuav qhib siab thiab caw Leej Ntuj Plig Ntshiab tuaj kho peb kom zoo, los yog peb yuav khiav Tswv Ntuj mus, tsis lees txais nws. Huab Tais paub tias peb txhua tus neeg yuav tsum tau txais kev cawm ntawm nws. Vim qhov no yog tib txoj hau kev, uas yuav pab kom peb rov ua tau ib tug neeg zoo thiab ntshiab huv tuaj nyob rau ntawm Huab Tais Tswv Ntuj lub zaim muag. Vim Huab Tais nqes los hu cov neeg txhaum kom tau kev tig rov los nrhiav Tswv Ntuj thiab los cuag nws nyob rau hauv nws txoj hau kev.

Tus nthuav : XH. Xyooj Tuam Lis, Zoo Tswv Zov Yaj