NTHUAV NTAWV MOO ZOO HNUB TIM 14/1/2020

CAIJ NRUAB XYOOS.
Yes Xus lub hwj huam tawm los nyob Kas Fas Naus. Nws kho ib tug neeg raug dab. (MK 1 : 21 - 28)
Yes Xus lawv mus hauv Kas Fas Naus. Hnub Xas Npas Tos, Yes Xus mus hauv lub tsev txoos, nws qhia sawv daws tam sim ntawd. Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.
Nyob hauv lawv lub tsev txoos, tam sim ntawd, muaj ib tug neeg raug ib tug dab tsis huv nthe nthe tias : "Yes Xus Nas Xas Les, koj xav ua dab tsis rau wb ? Puas yog koj tuaj rhuav wb ? Kuv paub koj yog leej twg : koj yog Tswv Ntuj tus Ntshiab."
Yes Xus cem nws tias : "Ua twj ywm, koj cia li tawm hauv tus neeg no mus."
Dab tsis huv siv zog muab tus neeg ntawd co heev heev, nws nthe ib suab nrov nrov ces nws tawm hauv tus neeg mus. Tas sawv daws ntshai, lawv sib nug zom zaws tias : qhov ntawd yog dab tsi ? Puas yog ib txog kev qhuab qhia tshiab muaj peev xwm ? Tab yog dab tsis huv, los nws tswj lawv, ces lawv mloog nws lus. Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais. 

Kwv tij sawv daws, yam hauj lwm uas muaj kev fim rau Tswv Ntuj, yam hauj lwm ntawd yeej muaj lub zog dua. Kev sib fim ntawm Huab Tais Yes Xus thiab Huab Tais Leej Txiv, ua rau txhua yam hauj lwm uas nws ua muaj zog thiab muaj hwj chim. 
Peb tsoom ntseeg sawv daws kuj ib yam, yog peb ua dab tsi, peb muaj kev fim rau Tswv Ntuj, peb teev Ntuj thiab peb thov kom Tswv Ntuj pab peb, mas zoo li peb muaj Tswv Ntuj lub zog txhawb peb, peb ua dab tsi los zoo li yooj yim, tsis muaj qhov daig qhov khuam. Peb tsis txhob txaj muag thov Ntuj, vim Tswv Ntuj saib xyuas peb, thiab nws yuav pub kom peb ua tau raws li peb txoj kev ntshaw.  Yog peb muaj kev fim rau Tswv Ntuj mas peb yuav tsis txawj tsis ntshai dab tsi hlo li.

Tus nthuav : XH. Xyooj Tuam Lis, Zoo Tswv Zov Yaj