NTHUAV NTAWV MOO ZOO HNUB TIM 10/1/2020

Lis piam 2 Caij Yes Xus Yug Los

Yes Xus kho ib tug neeg mob ruas. (LK 5 : 12 - 16)
Muaj ib zaug, Yes Xus nyob hauv ib lub nroog, muaj ib tug neeg tuaj, nws ib ce mob ruas tas huv si. Thaum nws pom Yes Xus, nws pe, nws khoov ntsej muag ti av, nws thov Yes Xus tias : "Huab Tais, yog koj xav, mas koj ua tau kom kuv rov huv."
Ces Yes Xus cev tes tuav tus neeg mob ruas, nws hais tias : "Kuv xav. Koj cia li huv mog."
Tam sis ntawd tus mob ruas tso tus neeg tseg. Yes Xus txwv tus neeg ntawd kom txhob hais dab tsi rau leej twg li. "Tab sis koj yuav mus thws koj lub cev rau tus Leej Choj saib, thiab koj yuav cev tej yam raws li Mais Xes qhia los ua pov thawj rau luag pom tias koj huv lawm."
Yes Xus lub moo ri zuj zus mus. Tej pab neeg coob coob tuaj sib txoos mloog Yes Xus, thiab thov Yes Xus kho lawv cov mob. Tab sis Yes Xus mus nraim nyob tom tej chaw tsis muaj neeg, nws teev Ntuj. 

Nyob rau hauv zaj no, peb yuav pom tias, tus neeg mob ruas uas nws raug luag tej ntxub luag tej qias tuaj cuag Huab Tais Yes Xus thiab thov kom Huab Tais pab kho nws tus mob. Thaum nws tuaj cuag Huab Tais Yes Xus, Huab Tais tsis ntxub tsis qias zoo yam li luag tej. Huab Tais Yes Xus hlub nws thiab nrog nws tham. Haub Tais Yes Xus kov nws thiab zoo siab kho nws tus mob kom zoo hlo tam sim ntawd. Tom qab ntawd Huab Tais thiaj tau xa nws mus coj lub neej tim khawv txog Tswv Ntuj lub Moo Zoo. 
Leej Ntshiab Zam hais tias : tib neeg coj lub neej ua tim khawv txog Tswv Ntuj nyob rau hauv lawv txoj kev ntseeg, thiab tsis tas li ntawd, kev ua tim khawv txog Tswv Ntuj nyob rau hauv txoj kev ntseeg, yuav muaj txoj sia yog yuav tsum los raws Huab Tais Yes Xus Pleev, thiab yuav tsum kawm tias, Huab Tais Yes Xus ua dab tsi, nws coj li cas.
Li ntawd, kev coj lub neej ua tim khawv, yog yuav tsum hais kom tsawg, tiam sis, coj kom zoo ua kom yog, cia yug tus yam ntxwv ua lub ncauj qhia luag mam thiaj zoo.

Tus nthuav : XH. Xyooj Tuam Lis, Zoo Tswv Zov Yaj