TXIV PLIG TSHAJ XWM KEV TSHAJ NTUJ LUS

(ttps://www.ncronline.org/news/parish/inspired-american-missioner-hmong-priest-walks-his-mentors-footsteps-us?fbclid=IwAR0MyB1GFuVEQ8zVqPCdDLHxc7R10zQSa3wApIPJCK6LHui1_yUDiUXdcns)

“Kuv xav ua ib tug tub tshaj Ntuj Lus zoo li Txiv Plig Tshaj Sawm,
ua hauj lwm pub rau cov neeg raug tso pov tseg.”

-TP. Tshaj Xwm-

Txiv Plig Tshaj Xwm tau txais txoj hauj lwm tshaj lub Moo Zoo rau cov haiv neeg toj siab nyob rau ntawm Milwaukee. Txiv Plig Tshaj Xwm hais tias : Nyob ntawm no nws tau tsob hwb cov neeg thoj nam tuaj ntawm Mias Mas teb thiab Los Tsuas teb, xws li haiv neeg Pas Kas Yos, Khas Xees, Chis thiab Hmoob.
Txiv Plig Tshaj Xwm txoj hauj lwm dhau ntawm kev tshaj Tswv Ntuj Lus ces yog mus tsham cov neeg mob nkees hauv tsev kho mob thiab tsham cov laus hauv lawv tej vaj tse.
Txiv Plig Tshaj Xwm piav txog nws kev ua Leej Choj tias tsis yog Tswv Ntuj nyuam qhuav hu nws, tiam sis yog thaum nws tseem me mas Txiv Plig Tshaj Sawm (Fr. Harry Thiel) tau tuaj txog lawv lub zos hauv xeev Naj, Thaib teb. Thaum ntawd nws txiv coj lawv los ntseeg, ces nws tau txais Cim Ntxuav thaum nws muaj 7 xyoo.
Nws niaj hmo hnov nws txiv thov Ntuj tias : Faj Tim Huab Tais Ntshiab. Cov lus no yog cov lus tau txhawb nws lub siab nyob hauv txoj kev ntseeg.
Tsis tas li ntawd, Txiv Plig Tshaj Xwm haiv ntxiv tias nws nyiam Txiv Plig Tshaj Sawm heev vim Txiv Plig Tshaj Sawm mus txhua qhov chaw uas muaj Hmoob nyob, txawm tias lwm tus Leej Choj tsis quav ntsej txog Hmoob los Txiv Plig Tshaj Sawm tsis coj xws li lawv. Txawm tias kev yuav ncua deb npaum cas los Txiv Plig Tshaj Sawm yuav mus kom txog, vim nws xav coj Hmoob los nrhiav Tswv Ntuj. Vim muaj Txiv Plig Tshaj Sawm ua piv txwv, mas nws thiaj xav tias loj tuaj nws yuav txiav siab ua Leej Choj thiab yoog raws Txiv Plig Tshaj Sawm tus yam ntxwv ntawd. 
“Kuv xav ua ib tug tub tshaj Ntuj Lus zoo li nws, ua hauj lwm pub rau cov neeg raug tso pov tseg.” Txiv Plig Tshaj Xwm hais li.
Ua ntej yuav txais Cim Tiag Tes ua Leej Choj mas nws ua Xib Hwb nyob hauv tsev hauv paus Hmoob Tseej Maim tau 4 xyoo, ces tom qab ntawd Txiv Plig Tshaj Sawm thiaj xa nws mus kawm hauv tsev kawm Leej Choj. Tim 23 lub 11 hlis 2006, nws mam tau txais lub Cim Tiag Tes ua Leej Choj.
“Kuv thawj txoj hauj lwm yog mus ua hauj lawm tshaj Ntuj Lus rau cov haiv neeg me nyob pog pem toj siab. Nyob ped mas tsis muaj tsev qhia ntawv rau cov me nyuam yaus, tsis muaj kiab khw, lawv tsuas ua neej nyob hauv kev ua liaj teb yug tsiaj txhu xwb.”
Txiv Plig Tshaj Xwm tau mus tshaj Ntuj Lus rau thaj tsam ntawm xeev Tseej Maim, Tseej Hais, Phas Yaus thiab Mej Hooj Xoos uas yog cov xeev nyob rau tog qaum teb hauv teb chaws Thaib. Lub tsev teev Ntuj tom qab uas Txiv Plig Tshaj Xwm saib xyuas nyob Thaib teb yog tsev teev Ntuj hwm Leej Ntshiab Pas Thiv hauv Meej Ceem xeev Tseej Maim, yog kav 17 lub zos, ob txhiab leej neeg ntseeg. 
Xyoo 2016, Txiv Plig Tshaj Xwm tau tuaj ua Thaj Txi Ntuj nyob hauv Chicago thiab nws tau mus tsham cov ntseeg hauv tsev teev Ntuj hwm Leej Ntshiab Miv Kas, hauv Milwaukee. Txiv Tswv Qhia hauv Milwaukee thiaj thov kom nws tuaj pab tshaj Ntuj Lus nyob rau Cheeb Koom Txoos Milwaukee. Tswv Qhia hais rau nws tias qhov twg los yeej yog Tswv Ntuj txoj hauj lwm, tsis hais hauv Thaib teb los yog ntawm no.
Vim li ntawd, lub 1 hlis 2018 Txiv Plig Tshaj Xwm thiaj ua ib siab mus ua Tswv Ntuj txoj hauj lwm rau haiv neeg Pas Kas Yos, Nplog thiab Hmoob hauv Milwaukee. Txiv Plig Tshaj Xwm hais tias tos nws ua ib siab tuaj pab tshaj Ntuj Lus rau ntawm no vim nws pom tias cov neeg thoj nam hauv Milwaukee yog ib pab yaj tsis muaj tswv, lawv tsis muaj chaw nyob xws li ib tug neeg mob ruas uas tsis muaj leej twg quav ntsej txog, lawv raug luag hiam thiab tso pov tseg.

 

Add new comment

5 + 0 =