HNUB YES XUS YUG

Hais txog lo ‘Christmas’ los lus Hmoob tias ‘Yes Xus Yug’ mas yog los ntawm lo lus tias ‘Leej Pleev thaj txi Ntuj’ los yog niaj hnub no peb hais tias ‘Hnub tsuj xeeb Yes Xus yug’, yog thawj hnub hauv Caij Yes Xus Yug Los.

Nyob hauv Mas Tais Ntawv Moo Zoo thiab Lus Kas Ntawv Moo Zoo sau txog lub caij Huab Tais Yes Xus yug tias: lub caij Hes Los ua vaj tswj lub tsheej Yes Lus Xas Les, tus vaj Xes Ntxas Aus Nkus Tus kom tas tuam ceeb Los Mas txheeb tsoom mej hwm, ces Yos Xes thiaj coj Mab Liab sawv kev hauv Nas Xas Les, xeev Nkas Lis Lais mus rau Das Vis lub zos Npes Les Hes, xeev Yus Das vim Yos Xes yog Das Vis caj ces. Thaum nkawd mus txog mas lub tsev txais qhua puv tas lawm, ces Mab Liab daws cev; yug tau tus me nyuam. Nkawd muab tus me nyuam Yes Xus qhwv ntaub tso pw hauv lub dab nyuj. Thaum ntawd, nyob thaj tsam ntawd, muaj ib co neeg zov yaj. Lawv nyob nruab teb. Hmo ntuj, lawv nyob zov lawv pab yaj. Huab Tais tus Tshiab tawm los rau lawv pom, thiab hais rau lawv tias hnub no tus cawm ntiaj teb neeg yug los lawm, nws yog Leej Pleev thiab yog Huab Tais.

Tsis tas li, muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias “Nyob saum cov txheej ntuj siab, Tswv Ntuj nto meej nto moo, nyob ntiaj teb, tsoom neeg Tswv Ntuj nyiam, nyob thaj yeeb.

Cov zov yaj thiaj sib yaum mus Npes Les Hes, lawv pom Mab Liab thiab Yos Xes, thiab pom tus me nyuam mos pw hauv dab nyuj.” (MT1:18-25, LK2:1-7)

Raws keeb kwm mas tsis paub tseeb tias Huab Tais Yes Xus yug rau hnub twg thiab xyoo twg tiag, cov kws txhawb fawb soj ntsuam tsuas xav tias tej zaum lub caij Huab Tais Yes Xus yug mas kwv yees li 2 xyoos ua ntej sau cia hauv Ntawv Moo Zoo los lawm.

Vim tsis muaj leej twg yuav txhawb nrhiav tau qhov tseeb ces nyob hauv tiam 4 lub Koom Txoos sab hnub poob thiaj teeb hnub tim 25 lub 12 hlis ua hnub tsuj xeeb Yes Xus yug, vim hnub ntawd yog txwm 9 hlis nkaus uas tus Tshiab Nkas Nplias xa xov tuaj rau Mab Liab, thiab yog hnub uas lub hnub txav mus kawg nkaus rau kab hnub ncig ntiaj teb sab qab teb.

Txawm yuav txiav tsis tau tias Huab Tais Yes Xus yug hnub twg tiag, los cov ntseeg sawv daws yuav nco ntsoov tias tim 25 lub 12 hlis yog hnub pib Caij Yes Xus yug, yog lub caij Huab Tais Tswv Ntuj nqes los ua neeg kom tau txhiv tib neeg hauv kev txhaum.

Add new comment

3 + 13 =