HNUB YES XUS TAWM TUAJ (Epiphany of the Lord)

Hnub Yes Xus Tawm Tuaj yog ib hnub uas cov neeg ntseeg tau teeb tsa tseg los nco txog thaum Huab Tais Yes Xus tawm los rau ntiaj teb neeg pom. Lo lus ‘Tawm Tuaj’ txhais tias ‘tus huab tais tswj tsoom sid tawm rooj mus xyuas nws haiv neeg, los yog Tswv Ntuj tawm tuaj rau tib neeg pom’.

Lub Koom Txoos sab hnub tuaj hais tias lub caij Yes Xus tawm tuaj mas yog lub caij tus me nyuam Yes Xus yug thiab yog lub caij thaum Yes Xus txais Cim Ntxuav ntawm Zam Ntxuav Plig. Txog tiam 4 mas Koom Txoos sab hnub tuaj thiaj hloov dua tshiab tias Hnub Yes Xus Tawm Tuaj tsuas yog hnub Yes Xus txais Cim Ntxuav xwb, vim lub caij ntawd thiaj yog lub caij uas Tswv Ntuj hais tias Yes Xus yog nws Leej Tub.

Nyob rau Koom Txoos sab hnub poob los yog lub Koom Txoos Kav Tos Liv, mas cav tias Hnub Yes Xus Tawm Tuaj yog hnub cov kws hnub qub tuaj hawm tus me nyuam Yes Xus, vim yog hnub Tswv Ntuj tau qhia nws rau pej kum neeg paub. Li ntawd, Koom Txoos Kav Tos Liv thiaj muab hnub tim 6 lub 1 hlis tsa ua Hnub Yes Xus Tawm Tuaj.

Add new comment

6 + 11 =