IB TUG TSEEM TUB TSHAJ NTUJ LUS YUAV COJ TUS YAM NTXWV ZOO LI CAS?

Huab Tais Yes Xus xa cov Hauv Paus Xa Lus mus thoob ntiaj teb, hais tias: Ntuj pub ib puas tsav yam hwj huam rau kuv nyob saum ntuj thiab ntiaj teb no. Nej mus, nej ua kom tas ib tsoom haiv neeg ua kuv thwj tim. (MT28:18-19) Mas peb nco tias txij ntawm lub caij Leej Ntuj Plig Ntshiab tau nqes los tshoj cov Hauv Paus Xa Lus rov los txog lub zim txwv no, mas thiaj tau muaj tej yam tuaj raws li Huab Tais tau hais tseg.

Yam li: nyob hauv ntau lub teb chaws thiaj tau muaj tej haiv neeg uas tau qhib lawv lub siab mloog lub Moo Zoo. Tej pab ntawd mam li tau tig los yuav lub siab tshiab, lawv tau txais lub Cim Ntxuav thiab lub Cim Txhab Zog; ua li ntawd tej lub Cheeb Koom Txoos xeeb tshiab lawd. Ces ob hnub no thiaj pom tej yam li no, hais tias 1 feem 3 ntawm tas cov neeg nyob hauv lub qab ntuj kuj yog Huab Tais Yes Xus cov thwj tim lawm.

Hais txog 2 feem 3 uas tsis tau tig los txais Huab Tais Yes Xus, mas peb yuav xav li cas? Hauv pab neeg ntawd mas xam pom tias ib txhia kuj tau hais tawm tias ‘Tej kev cai teev hawm uas peb poj yawm txwv koob ib txwm coj thiaj yog ib txoj kev cai haum peb siab, tsis tas yuav coj lwm yam kev cai!’ Lub Moo Zoo tsis tau raug lawv siab, puas yog vim ib cov tub tshaj Ntuj Lus tsis tau hais tej lus haum cov neeg ntawd tej txuj ci?

Thaum yus pom tib pab neeg uas tsis txais lub Moo Zoo, mas peb puas yuav ua raws tej zaj lus hauv Ntawv Moo Zoo hais tias “Yog nej mus hauv lub nroog twg, luag tsis txais nej, nej tawm mus ntawm tej tshav puam- nej yuav hais tseg tias: tab yog tej plua av lo peb ko taw hauv nej lub nroog no, peb muab tso tseg rau nej huv tib si.” (LK10:11) Txhais tias “Kav liam lawv!”, los peb puas yuav hais lus tseg tias “Lawv kaw lawv lub siab rau lub Moo Zoo, ces peb yuav tsis us tus dab tsi los pab cov neeg ntawd kiag.” Peb yuav tsum tsis txhob ua li ntawd.

Tus sau: TP. Txhiaj Foom (2003)

Add new comment

1 + 0 =