Hnub Chiv Tim 30 Lub 5 Hlis

Hnub Chiv Tim 30 Lub 5 Hlis

 

Lub Hwm Huab Tais Peb Leeg

Mas Tais 28: 16-20

 

Hnub chiv no yog hnub hwm peb leeg huab tais. Cov lus uas Mas Tais hais tias “Nej mus, nej ua kom tas txhia haiv neeg ua kuv thwj tim. Nej hu txog Leej Txiv thiab Leej Tub thiab Leej Tswv Tim Ntshiab lub npe, nej ua lub Cim Ntxuav rau Lawv.” Qhov no yog qhov tseeb hais txog Peb Leeg Huab Tais uas Yes Xus qhia cov thwj tim. Nco tsoov tias muaj Tswv Ntuj ib Leeg xwb. Peb hais txog peb leej huab tais, tsis txhias tias muaj Tswv Ntuj peb leeg. Tab sis hauv ib Leeg Tswv Ntuj muaj peb leeg huab Tais uas Yog Huab Tais Leej Txiv muaj hwj huam tas nrho, yog tus tsim ntuj tsim teb, thiab Huab Tais Leeg Tub twm zeej, yog peb tus Huab Tais Yes Xus. Thiab Huab Tais Leej Ntuj Plig Ntshiab tus ua kom Leej Tub xeeb los ua neeg nyob ntiaj teb no. Thiab Nws tshoj tib neeg siab kom tib neeg taug Tswv Ntuj txoj kev huav lub Koom Txoos Ntshiab. Yes Xus hias tias Leej Ntuj Plig yuav nqes los nrog cov neeg ntseeg nyob, Yes Xus kuj yuav nrog peb sawv daws nyob mus li mus txog hnub ntiaj teb kawg.

 Hais txog Peb Leeg Huab Tais tsis yooj yim kiag li. Peb paub tias peb paub txog Tswv Ntuj tsis tag nrho, thaum peb ua li ntawd tau, peb kuj yog Tswv Ntuj lawm, puag yog? Li cas los xij, kev txuj uas peb paub txog Tswv Ntuj kuj txaus lawm, txaum ua kom peb ntseeg tias Tswv Ntuj hlub peb sawv daws txhua leeg txhua lus.

Nco tsoov tias ua ntej teev Ntuj los thov Ntuj los Ua thaj txi Ntuj, peb ua ntoo cuam lub cim thiab hais tias “Hu txog Leej Txiv thiab Leej Tub thiab Leej Ntuj Plig lub npe. Ua li.” Qhov tseeb yog tias peb hu txog Huab Tais Peb Leeg tas li, thaum peb ua ntoo cuam lub cim. Ua li ntawd, kuv caw peb sawv daws nquag hu txog Huab Tais Peb Leeg, muaj kev kub siab teev Ntuj. Tsis nyuaj os! Tsuas ua li no xwb “hu txog Leej Txiv thiab Leej Tub thiab Leej Ntuj Plig lub npe. Ua li.” Thiab muaj ib zaj teev Ntuj hu tias “Zaj Hwm Peb Leeg Huab Tais” kuv caw nej sawv daws teev Ntuj ua ke, hais li no, “Huab Tais Leej Txiv, Huab Tais Leej Tub, Huab Tais Leej Ntuj Plig, muaj koob meej nto moo lug, lub zim txwv no mus txog fab lwm txheej, xws li txheej laus thaud los, ua li.”

 

Kuv xav nthuav lub Moo Zoo li no xwb. txhob tsis nco qab teev Ntuj los thov Ntuj ntiaj hnub. Ua tswv Ntuj tsaug rau txhua yam Nws muab rau peb. Thov Tswv Ntuj, Peb Leeg Huab Tais, foom koob foom hmoov rau nej sawv daws txhua leeg txhua tus. Nyob zoo.

Add new comment

7 + 4 =