CAIJ YES XUS YUG LOS

Txij hnub tim 24 lub 12 hlis hmo ntuj txog hnub tim 13 lub 1 hlis, peb yuav hwm Yes Xus yug los, hwm Yim Neeg Ntshiab, hwm Mab Liab ua Yes Xus niam. Hnub tim 6 lub 1 hlis peb hwm Yes Xus tawm tuaj rau ntiaj teb neeg pom. Hnub tim 13 lub 1 hlis peb hwm Yes Xus txais lub Cim Ntxuav, ces tag lub Caij Yes Xus yug los.
Nyob hauv lub Caij Yes Xus yug los, mas peb nyeem Ntawv Ntshiab hais txog Yes Xus yug, hais txog Yes Xus lub npe, hais txog Yes Xus xav yau, hais txog Yim Neeg Ntshiab, hais txog Yes Xus tawm tuaj rau ntiaj teb pom xyeem thiab hais txog Yes Xus lub Cim Ntxuav.
Thaum peb hu nkauj ua Txoov teev Ntuj, peb yuav rov qab hais zaj ‘Nyob Pem Ntuj’ los yog cov nkauj Tswv Ntuj nto Moo, vim cov Tshiab tau hais cov lus no rau cov zov yaj mloog. Peb hais tej zaj lub Koom Txoos tsim los cav txog Yes Xus yug los. Peb hais tej zaj Nkauj Paj Nruag cav txog Leej Tub tuaj coj Tswv Ntuj haiv neeg.
Txij hnub nyoog ua lub Txoos hwm Yes Xus tawm tuaj, mas peb cav txog cov Kws Hnub Qub tuaj hawm Yes Xus thiab cav txog ntiaj teb neeg yuav tuaj teev Yes Xus.
Lub Caij Yes Xus Yug Los, mas peb yuav tu lub tsev teev Ntuj kom zoo nkauj. Peb ua ib lub me nyuam tsev hais txog Yes Xus yug los. Leej Choj yuav hnav tsoos tsho tsos kub los tsos dawb, vim peb zoo siab. Peb sau cov duab hais txog Yes Xus tawm tuaj rau ntiaj teb pom xyeem.
Caij Yes Xus Yug Los yog ib lub caij zoo siab, yog li peb yuav ua tej yam lom zem vim peb tus Huab Tais tuaj nyob ntiaj teb no. peb xav kom tas tsoom neeg paub Yes Xus lub siab hlub neeeg. Hmo Yes Xus yug los, mas peb ua tej yam lom zem nyob hauv peb tej tsev thiab hauv peb tej zej zog. Hmo no ua Thaj Txi Ntuj tas, peb sawv daws ua ib pluag xob yem noj. Peb pub paj tshab rau cov me nyuam, rau cov neeg me, rau cov neeg pluag. Peb ua tej lub hnub qub. Peb foom lus zoo kom lub xyoo tshiab sawv daws tau nyob zoo. Peb tso siab tias Yes Xus ua peb tus Huab Tais coj tas txhia haiv neeg mus nyob ua ke thaj yeeb.

Vam txog TP. Nyiaj Pov phau ntawv : TXOJ TUAM KEV TEEV NTUJ

Add new comment

7 + 5 =