ZAJ NYEEM HNUB TIM 6 LUB 4 HLIS 2024
HNUB XYA LUB LIS PIAM HLA
COV LUS NYOB HAUV MAS KOS NTAWV MOO ZOO (MK 16: 9-15)
Cov kwv tij Hmoob sawv daws, nyob hauv Ntawv Moo Zoo peb pom tias Huab Tais Yes Xus tawm los rau Mab Liab Mas Ntas Las pom, ces Mab Liab Mas Ntas Las mus hais qhia rau cov thwj tim tab sis lawv tsis ntseeg.
Tom qab Huab Tais Yes Xus thiaj tawm los rau 2 tug thwj tim pom thaum nkawd tab tom taug kev mus Es Mas Ws. Nkawd los hais qhia rau pab thwj tim, tsis kav lawv tsis ntseeg thiab.
Kwv tij Hmoob sawv daws, vim cov thwj tim tsis ntseeg mas thaum Huab Tais Yes Xus tawm kiag rau lawv pom, nws thiaj yws lawv lub siab tsis ntseeg ntawd.
Thaum lawv pom kiag Huab Tais Yes Xus ntawm qhov muag lawm tiag, ces lawv ntseeg tias Huab Tais Yes Xus tau sawv rov los lawm tiag. Yog li Huab Tais Yes Xus thiaj ntuas lawv kom coj lub Moo Zoo no mus tshaj kom thoob qab ntuj.
Kwv tij Hmoob sawv daws, peb yuav nquag thov Huab Tais Yes Xus qhib peb lub siab kom ntseeg txog nws txoj kev sawv rov los thiab kom peb kub siab tshaj Yes Xus lub Moo Zoo rau lwm tus mog! Nyob zoo sawv daws.
