ZAJ NYEEM HNUB TIM 5 LUB 4 HLIS 2024
HNUB RAU LUB LIS PIAM HLA
COV LUS NYOB HAUV ZAM NTAWV MOO ZOO (ZM 21: 1-14)
Kwv tij Hmoob sawv daws, Huab Tais Yes Xus tuag tas, nws sawv rov qab los, nws yuav rov mus saum ntuj, ces Huab Tais Yes Xus thiaj siv lub sij hawm luv luv no nrog cov thwj tim nyob, npaj lawv kom txhij ua Tswv Ntuj txoj hauj lwm ntxiv mus.
Ntawv Moo Zoo hais tias cov thwj tim tawm mus puav ntses, lawv puas tsis tau ib tug ntses li. Lawv hnov ib tus neeg hais kom lawv pov lub vas ntses rau ntawm lub nkoj sab xis, mas lawv ua raws ua ciav lawv puav tau ntses tiag.
Zaj no zoo xws li thaum Huab Tais Yes Xus pib hu cov thwj tim los raws nws, nws hais rau Pob Zeb tias “Koj nquam nkoj mus lawm tom qhov dej tob, nej tso nej cov puav ntses mus ntes ntses.” Thaum ntawd, Pob Zeb cav lus me ntsis tab sis nws ua raws ces lawv puav tau ntses ntau. Pob Zeb ntshai, ces nws hais tias “Huab Tais, koj txav mus deb kuv vim kuv yog ib tug neeg txhaum.”
Tab sis nyob hauv hnub no, thaum Pob Zeb hnov ib tug thwj tim hais tias “Tus hais lus rau peb ntawd yog Huab Tais Yes Xus”, mas nws dhia plho hauv dej mus cuag Huab Tais Yes Xus, txawm tias ua ntej ntawd nws tsis lees Huab Tais Yes Xus txog 3 zaug.
Kwv tij Hmoob sawv daws, muaj ntau zaus peb tsis lees Huab Tais Yes Xus ua peb tus Huab Tais, ua peb tus Tswv Ntuj. Tab sis Huab Tais Yes Xus tos ntsoov kom peb thim xav thiab zoo siab rov mus cuag nws. Nyob ntawm peb, saib peb puas tu siab thiab kub siab rov los nrhiav Huab Tais Yes Xus, rov los hu nws ua peb tus Huab Tais, peb tus Tswv Ntuj.
Peb puas tso siab rau Huab Tais Yes Xus lub suab hu kom peb ua nws cov hauj lwm. Yog peb ua cov hauj lwm raws li Huab Tais Yes Xus hais, mas peb puas yuav muab los cev rau Huab Tais Yes Xus, los ua Huab Tais Yes Xus tug xws li Pob Zeb uas nws nce mus saum lub nkoj, ces rub lub vas mag ntses nqes saum nkoj los.
Yog peb ua li no, mas muaj ib hnub Huab Tais Yes Xus yuav caw peb mus noj nws rooj qav nyob pem Ntuj Ceeb Tsheej zoo li hnub no Huab Tais Yes Xus hais rau lawv tias “Kuv twb ci tau cov ntses thiab npaj tau cov ncuav mov tas lawm, nej los noj tshais mas!”
