Hnub Chiv Tim 24 Lub 3 Hlis Ntuj 2024
Lub Caij Plaub Caug Hnub Chiv Nquam Nplooj
Mas Kos. 14:1-15:47
“Nej zov hmo, thiab nej teev Ntuj kom nej txhob nkag mus rau hauv txoj kev ntxias.”
Nyob zoo…
Hnub chiv no yog Hnub Chiv nquam Nplooj. Pib hnub no, peb tab tom taug kev hauv lub lis piam Ntshiab lawm. Hnub no, peb mloog zaj Nyeem Ntawv Moo Zoo ntev me ntsis. Thov peb mloog kom zoo, peb mloog li no, peb dhuav dhuav mloog li, tsis xav mloog lawm, tab sis, Huab Tais Yes Xus yeej txhawj siab dua peb. Nws ntshai heev thiab txhawj kawg. Nws tus plig ntxhov siab yuav tuag. Li ntawd, kwv tij sawv daws, hnub no peb nrog Yes Xus hauv nws txoj kev txom nyem. Ntawm peb mas yog feem tsawg xwb, tab sis tseem ceeb kawg ntawm Yes Xus.
Mas Kos piav tias Nyob Nkes Txes Mas Nis, Yes Xus ntshai heev thiab txhawj kawg, nws tus plig ntxhov siab yuav tuag, nws thiaj li thov kom nws cov thwj tim uas yog Pob Zeb, Yos Kos, thiab Zam nrog nws mus. Nws thov kom lawv zov hmo nyob ntawd, vim nws lub siab ntxhov yuav tuag lawm. Nyob hauv lub sij hawm li no, Yes Xus thov kom nws cov thwj tim “zov hmo thiab Ntuj kom nej txhob nkag mus rau hauv txoj kev ntxias: lub tswv yim kub lug, tab sis cev nqaij tsis muaj zog.”
Cov kwv tij hmoob sawv daws, ntau zaus mas, peb kuj yog li no thiab. Ntawm kev ntxias mas, peb lub tswv yim kub lug, peb xav ua raws li Yes Xus cov lus qhia, peb paub zoo tias qhov no zoo, qhov no tsis zoo, tab sis mas ib yam li Yes Xus hais, lub tswv yim kub lug, tab sis cev nqaij tsis muaj zog. Peb cev nqaij tsis xav ua raws li Yes Xus lo lus, peb cev nqaij tsis xaiv qhov zoo, qhov ncaj ncees. Ntawm kev ntxias li no mas, Tswv Ntuj tib leeg xwb thiaj pab peb tau. Li ntawd, peb yuav tsum teev Ntuj, thov Tswv Ntuj pab peb, cawm peb ntawm kev ntxias.
Hnub chiv no yog Hnub Chiv nquam Nplooj. Yog hnub uas “tas tsoom neeg lawv Yes Xus qab thiab qw tias ‘Das Vis Leej Tub, thov koj cawm peb. Tus uas Huab Tais xa tuaj, nto koob meej, tus nyob suam cov txheej ntuj siab, thov koj cawm peb!’”
Nquam nplooj muaj lub ntsiab txog kev muaj yeej ntawm kev txhaum, kev muaj yeej ntawm kev tuag. Tus maum luj muaj lub ntsiab txog kev tsob hwb luag tej, txoj kev txom nyem, thiab kev txo hwj chim. Txhua yam no hais txog Huab Tais Yes Xus yog tus Vaj, Haub Tais Yes Yus yog tus Pleev, nws yog tus tuaj cawm neeg ntawm kev txhaum thiab tsaus ntuj nti. Nws yeej kev txhaum, kev tuag. Nws muab kev muaj yeej rau cov neeg uas ntseeg nws thiab ua raws li nws.
‘Huab Tais Yes Xus txoj kev txom nyem’ lus English hu tias “the Passion of Christ” yog Huab Tais Yes Xus kawg hauj lwm ua ntej nws yuav sawv rov los muaj txoj sia tshiab. Nws txoj kev txom nyem qhia kom tseeb txog Tswv Ntuj txoj kev nyiam kev hlub tib neeg. Qees leej pom txoj kev txom nyem no zoo li yam phem tshaj plaws. Kev tuag saum ntoo cuam yog kev phem tshaj plaws tab sis mas Huab Tais Yes Xus muab lub ntsiab tshiab rau tus Ntoo Cuam. Huab Tais Yes Xus txoj kev txom nyem tsis yog yam uas cov ntseeg yuav ntshai. Tsis yog! Tsis yog tiag tiag! Yes Xus kev txom nyem yog kev nyiam kev hlub luag tej tshaj uas rau yus muab yus tus kheej rau luag tej kev noj qab nyob zoo, muab yus tus kheej rau luag tej kev cawm, muab yus tus kheej rau luag tej muaj txoj sia nyob mus li.
Kwv tij hmoob sawv daws, hauv peb lub neej kuj ib yam li thiab. Peb sawv daws muaj kev txom nyem hauv peb lub neej. Tsis muaj leej twg tsis muaj kev txom nyem. Tab sis peb, cov ntseeg txog Yes Xus, yuav tsum ua raws li Yes Xus qhia peb hnub no. yog hais tias thaum peb poob hauv kev ntxias, thov peb nquag teev Ntuj, thov Ntuj pab peb. Ntawm kev ntxias mas, peb yuav raug kev txom nyem, kev ntxhov siab, kev nyuag siab ntau yam, tab sis mas, peb yuav yeej tau kuj vim Tswv Ntuj pab peb xwb. Li ntawd, hauv lub caij no, thov kom peb zov hmo thiab nrog Yes Xus hauv nws txoj kev txom nyem. Ces, thaum txoj kev txom nyem no tiav tas lawm, peb sawv daws yuav zoo siab tshaj tawm ua ke tias Yes Xus sawv rov los lawm. Alleluia.”
Thov txhawb nqa lub zog rau peb cov ntseeg txog Yes Xus sawv daws txhua leej txhua tus kom muaj kev ntseeg txog Tswv Ntuj tsis tu ncua mog.
