Vas Tis Kas cov neeg hais tias lub Koom Txoos tsim nyog tso cai rau cov txiv neej muaj txij nkawm lawm ua Txiv Plig tau
Ib tug neeg ua hauj lwm nyob Vas Tis Kas hais tias nws xav tias kev cia cov Txiv Plig Ka Tos Liv nyob tab seeb tsim nyog yuav daws kho tau lawm.
Tswv Qhia Charles Scicluna uas yog tus Tswv Qhia nyob Malta thiab yog tus lwm tswj ntawm Vas Tis Kas fab qhia kev ntseeg hais nyob hauv kev ntxig nug uas tshaj tawm hnub tim 7 lub 1 hlis no tias lub Koom Txoos tsim nyog yuav ua tib zoo xav txog kev pauv ntxeev ntawm cov neeg sab hnub poob.
Tswv Qhia nws muaj 64 xyoos, nws hais tias lub Koom Txoos tsim nyog yuav xyaum raws cov Koom Txoos sab hnub poob, tso lus rau cov txiv neej uas yuav poj niam lawm kom lawv muaj cai ua Txiv Plig.
Hais txog kev nyob tab seeb ntawm cov Txiv Plig raug muab coj los sib tuav xam nyob hauv cov Tswv Qhia lub rooj sab laj xyoo 2019 nyob Pan-Amazon. Tab sis qhov kawg Vaj Qhia Fas Ntshis Kus tsis hais txog kev nyob tab seeb raws li lwm tus cev lus tom qab lub rooj sab laj. Ces cov lus no raug muab rov los hais nyob hauv lub rooj sab laj Tswv Qhia Synod on Synodality lub 10 hli xyoo 2023 nyob Vas Tis Kas.
Lub rooj sab laj tau nug txog tias puas tsim nyog yuav txuag kev nyob tab seeb ntawm cov Txiv Plig Kav Tos Liv los tsis tsim nyog, thiab thov kom muab cov lus nug no rov mus tham nyob hauv lub rooj sab laj zaum tom ntej uas yog lub 10 hli xyoo 2024. Pom tias muaj kev ntsuam xyuas sib txawv nyob hauv lub rooj sab laj Tswv Qhia thawj zaug.
