KEV NTSEEG KAV TOS LIV NYOB THAIB

Tam sim no cov neeg ntseeg Kav Tos Liv nyob thoob Thaib teb muaj li ntawm 388,469 leej, muaj 11 lub Cheeb Koom Txoos kav cov neeg ntseeg. Muaj cov Tswv Qhia, cov Txiv Plig, cov Leej Phauj thiab cov Leej Tsob Hwb li ntawm 848 leej. Muaj 526 lub tsev teev Ntuj loj thiab me nyob thoob Thaib teb. Txoj kev ntseeg Kav Tos Liv thiab Thaib teb sib ua phooj ywg los ntau pua xyoo lawm. Txoj kev ntseeg Kav Tos Liv pib muaj Cheeb Koom Txoos nyob Thaib teb, hauv lub nroog Koos Xim As Yub Thas Yas xyoo 1669. Xyoo 2019 no, txwm 350 xyoo ntawm thawj lub Cheeb Koom Txoos nyob Thaib teb. Vim li ntawd, Vaj Qhia Fas Ntshis Kus thiaj yuav tuaj tsham Thaib teb raws li tseem hwv Thaib thiab lub rooj Tswv Qhia nyob Thaib teb cov lus caw. Txoj kev ntseeg Kav Tos Liv twb nkag tuaj nyob Thaib teb tau 500 tawm xyoo lawm, uas yog cov tub tshaj Ntuj Lus neeg txawv teb chaws coj tuaj xyoo 1511. Tab sis ua ntej ntawd mas tsuas muaj cov neeg ntseeg thiab cov tub tshaj Ntuj Lus txawv teb chaws xwb, tsis tau muaj lub Cheeb Koom Txoos. Lub Cheeb Koom Txoos nyuam qhuav los tsim muaj nyob hauv xyoo 1669. Txij thaum muaj lub Cheeb Koom Txoos Kav Tos Liv nyob Thaib teb los txog zim txwv no, mas Thaib teb nyuam qhuav tau tos txais ib tug Vaj Qhia tuaj ntawm Vas Tis Kas tuaj xwb, yog Vaj Qhia Zam Paj Lug Ob tuaj tsham Thaib teb hnub tim 10 – 11 lub 5 hlis xyoo 1984. Dhau los lawm 35 xyoos, mas thiaj rov muaj dua ib tug Vaj Qhia yuav tuaj tsham Thaib teb, tus Vaj Qhia ntawd yog Vaj Qhia Fas Ntshis Kus tuaj tsham Thaib teb rau lub 11 hlis xyoo 2019 no. Hos hais txog cov vaj ntxwv Thaib uas tau mus tsham Vaj Qhia nyob Vas Tis Kas, mas muaj 3 zaug. Xws li hnub tim 4 lub 6 hli xyoo 1897, tus vaj Thaib tim 5 tau mus tsham Vas Tis Kas thiab ntsib Vaj Qhia Les Os tim 13. Hnub tim 21 lub 3 hlis xyoo 1934, vaj ntxwv Thaib tim 7 tau mus ntsib tus Vaj Qhia Pis Os tim 11. Thiab zaum kawg, mas yog tus vaj Thaib tim 9 thiab tus poj vaj tau mus ntsib Vaj Qhia Zam Paj Lug Ob nyob Vas Tis Kas, hnub tim 3 lub 10 hli xyoo 1960. Zaum no mas yog zaum 2 uas ib tug Vaj Qhia ntawm lub Koom Txoos Kav Tos Liv nyob Vas Tis Kas tuaj tsham Thaib teb, yog Vaj Qhia Fas Ntshis Kus, yog tus Vaj Qhia tim 266. Vaj Qhia yug hnub tim 17 lub 12 hlis xyoo 1936, nyob hauv lub nroog Npuas Nos Ais Lem (Buenos aires), teb chaws As Zees Tis Nas (Argentina).

Tus tsau : Lis Maib, Zoo Tswv Zov Yaj

Add new comment

4 + 3 =

Please wait while the page is loading