Cov Leej Phauj Kav Tos Liv pab cov me nyuam ntxhais Nes Pas uas tsis muaj zog, kom lawv rov muaj lub neej tshiab
Cov me nyuam ntxhais thiab cov poj niam 5,743 leej poob nyob hauv txoj kev raug quab yuam nyob Nes Pas xyoo 2022.
Raws kev tshaj tawm nyob hauv tsaib no hais tias : Leej Phauj Rachel Leela uas yog tus thawj coj ntawm lub tsev Opportunity Village Nepal (OVN), teeb tsa los ntawm cov Leej Phauj tus Zoo Tswv Zov Yaj. Lub tsev no yog lub chaw so ntawm cov me nyuam ntxhais thiab cov poj niam uas raug quab yuam, xws li cov ua niam ntiav, cov raug mos deev thiab cov raug nyiag mus muag.
Muaj 17 leej yog cov hnub nyoog 4 xyoos txog 18 xyoo. Tam sim no lawv so nyob hauv Safe home. Lawv yog tuaj ntawm txhua qhov chaw nyob Nes Pas tuaj. Tam sim no lub tsev OVN yog lawv lub tsev nyob. Nyob ntawd lawv tau txais kev saib xyuas zoo los ntawm cov Leej Phauj thiab cov neeg ua hauj lwm nyob hauv lub tsev OVN. OVN pab txhawb nqa fab kev kawm rau cov me nyuam ntxhais thiab cov poj niam ntawd.
Qhov chaw pab txuag cov poj niam Hemja, yog pib hauv xyoo 2010 tom qab uas cov Leej Phauj tus Zoo Tswv Zov Yaj teeb tsa lub tsev OVN. OVN tau txais kev txhawb nqa los ntawm cov Yes Xus Is neeg Kas Nas Das, kom tau pab cov neeg pluag txom nyem. Qhov tseem ceeb yog cov me nyuam ntxhais thiab cov poj niam.
Yav tag los OVN tau qhia txog kev ua hauj lwm rau cov poj niam thiab cov me nyuam ntxhais uas lawv raug quab yuam, kom lawv txawj mus nrhiav hauj lwm ua. Kom lawv muaj nyiaj rau lawv siv pab tus kheej nyob kaj siab lug.
