HNUB NO THOV KOM PEB XAV TXOG KEV NYIAM

Hnub Chiv lis piam 7 hauv Caij Nyob Nruab Xyoos los yog hnub tim 23 lub 2 hlis no, Vaj Qhia Fas Ntshis Kus tau mus ua Thaj Txi Ntuj nyob hauv lub nroog Npas Lis, Is Tas Lias teb (Bari, Italy); Vaj Qhia hais kom sawv daws thov txiaj ntsim kev nyiam ntawm Tswv Ntuj.
Vaj Qhia nthuav Mas Tais Ntawv Moo Zoo (MT 5 : 38-48) tias Huab Tais Yes Xus lub tswv yim mus deb dua cov His Xas Lais txoj cai qub. Huab Tais Yes Xus lub tswv yim thiab cov lus qhia yog kom peb txhob sib pauj kuab zaub ntsuab zoo li ntawd.
Huab Tais Yes Xus cov lus tsis yog yuav ua rau tsis muaj cov neeg ua txhaum ntxiv, tiam sis Huab Tais Yes Xus cov lus qhia tias Huab Tais Tswv Ntuj, peb Leej Txiv tseem nyiam peb txhua tus; txawm tias peb tsis muab kev nyiam rov qab rau Tswv Ntuj. Tsis yog hais ntawm ncauj xwb, tab sis Huab Tais Yes Xus tseem ua raws li nws cov lus qhia thiab. Huab Tais Yes Xus tsis tau tes nthi cem cov neeg hiam thiab tsim txom nws, tab sis Huab Tais Yes Xus tsa nws ob txhais tes txais sawv daws nyob saum tus Ntoo Cuam.
Huab Tais Yes Xus cov lus yog cov lus hais ncaj thiab hais meej tiag, Huab Tais Yes Xus cov lus yog txoj kev uas tus ua Leej Pleev tib leeg xwb thiaj yuav ua tau. Huab Tais Yes Xus hais tias ‘nej yuav nyiam nej tus yeeb ncuab’. Huab Tais Yes Xus cov lus muaj lub tswv yim zoo. Huab Tais Yes Xus txoj kev nyiam kev hlub tsis muaj chaw kawg.
Vaj Qhia rov hais rau sawv daws tias “Muaj puas tsawg zaus peb tsis quav ntsej txog Huab Tais Yes Xus kev nyiam.”
Vaj Qhia hais tias yog ib yam tsis yooj yim kiag li uas peb yuav nyiam tau raws li Huab Tais Yes Xus qhia peb, tab sis yog ua tsis tau mas tej zaum Huab Tais Yes Xus yuav tsis hais li no rau peb. Yog peb siv peb dag zog xwb mas yeej tsis yooj yim, yog li peb thiaj yuav thov Tswv Ntuj pab peb, thov Huab Tais Ntuj kom peb paub txog kev nyiam. Peb yuav tsum nquag thov Ntuj kom Ntuj txiaj ntsim nyob hauv peb thiab tshoj peb ua raws lub Moo Zoo, kom peb tau yog ib tus neeg ntseeg tiag. Kom nyob hauv hnub kawg hauv peb txoj sia, peb tau kev nyiam ua peb qhov chaw txiav txim.
Kawg no, Vaj Qhia hais tias : Hnub no peb yuav xaiv kev nyiam, peb yuav txais Huab Tais Yes Xus cov lus qhia coj lus ua raws kom peb tau ua ib tus neeg ntseeg tiag thiab kom lub ntiaj teb no yog tib neeg lub.

Tus txhais : Muas Lauj, Zoo Tswv Zov Yaj

Add new comment

11 + 4 =

Please wait while the page is loading