HMOOB THIAB NCUAV

Yog hais txog lub caij ntuj no yuav xaus ib xyoos mas peb nco txog dab tsi? Qee leej nco txog toj roob hauv pes pos huab dawb, qee leej nco txog kev sau qoob loo los tsev, qee leej nco txog lub ntug cub, qee leej nco txog lub ncuav mov sov sov hauv qhov cub, qee leej nco txog lwm yam kuj muaj.

Hais txog lub ‘ncuav’ peb niaj xyoo ci noj ntawm ntug cub, mas peb puas xav tias muaj lub keeb los li cas?

Muaj ntau tus tej zaum yuav xav tsis txog, muaj ntau tus hais tias qhov ntawd peb tsis paub txog, muaj ntau tus hais tias yog yam tsis tseem ceeb thiab muaj ntau tus yuav hais tias yog poj koom yawm txwv ib txwm ua los.

Peb cov kwv tij Hmoob nyob Xov Tshoj thiab cov teb chaws ntuj tshiab, peb muab cov mov nplaum tuav mos no hu tias ‘Ncuav’. Tab sis peb cov kwv tij Hmoob hauv Tuam Tshoj los yog Suav teb, lawv muab hu tias ‘Tseeb Kob’. Peb tuav ncuav thaum yuav txog caij peb caug, hos cov nyob Suav teb tuav thaum hnub tim 19 lub 9 hli ntuj.

Nyob rau lub zim txwv no, peb tuav ncuav los noj tom hniav nte taws; tab sis thaud mas cov Hmoob Suav lawv tuav los teev ‘Niam Nkauj Kab Yeeb’, hos cov kwv tij Hmoob tsiv los rau Xov Tshoj tuav ncuav los txi poj yawm thiab tu poj yawm moo vim ncuav yog lub cim ntawm Nkauj Hnub thiab Nraug Hli; Nkauj Qub, Nraug See; Iab Yeej Lis, Siv Nos Toog niam txiv ntawm txhua yam hauv ntiaj teb.

Vim ncuav yog yam coj los txi poj yawm, yog li thaum tuav ncuav thiaj yuav npaws 2 lub cia; thawj lub me me li cov peb yuav noj, lub ob mas loj li lub vab tshaus. Ob lub ncuav no yog tseg cia npaws poj yawm thiab tu moo thaum tsiab peb caug puv 3 tag kis.

Dhau ntawm kev tuav ncuav nyob rau lub caij yuav xaus xyoo laus lawm, peb Hmoob txawm tuav ncuav los siv thaum ‘tso plig’ thiab. Thaum tso plig mas yuav siv 3 lub ncuav coj los sib tshooj, lub nyob hauv qab yog ‘Neej’, lub nruab nrab yog ‘Plig’ thiab lub saud yog lub ncuav ‘Tu Moo’.

Cov kwv tij Hmoob sawv daws, yog nej tus twg ho paub dua lwm zaj hais txog peb Hmoob lub ncuav no los, ho sau tuaj rau Zoo Tswv Zov Yaj muab nthuav rau ib tsoom kwv tij Hmoob tau paub ua ke mog.

Txhawb nrhiav los ntawm : Nyiaj Vaj Lauj hauv zos Khej Me, Hmoob Kev Lis Kev Cai (Lis T. Xyooj), Hmoob nyob Paj Tawg teb (Zhang Yuan Qi, Yves Bertrais and Heu Nyia Ngau), www.vovworld.vn

Tus sau : Zoo Tswv Zov Yaj

Add new comment

14 + 6 =

Please wait while the page is loading