Hmoob lub tsev khaws qub txeeg qub teg nyob Sanger, nroog Fresno, xeev California

Hmoob muaj ib lub tsev khaws Hmoob tej qub txeeg qub tes nyob Sanger, nyob ntawm ntug nroog Fresno, xeev California. Tsis tshua muaj neeg paub txog lub tsev khaws qub txeeg qub tes no. Tsav Foom Lis los yog neeg paub nws nyob hauv Asia Supermarket ntawm txoj kev Tulare Ave, hauv lub nroog Fresno. 

Sab tom qab ntawm lub tsev khaws Hmoob tej qub txeeg qub tes ntawd, mas yog nyob ntawm txoj kev 910 S. Leonard Ave.

Raws kev ntxig nug ntawm Hmong Daily News, Tsav Foom Lis hais tias : nws pib khaws pib ceev cov thawj coj Hmoob tej duab thiab Hmoob tej khoom siv ntau ntau xyoo los lawm. Xyoo 2020 nws tau qhib lub tsev khaws qub txeeg qub teg rau tib neeg nkag mus saib. Muaj cov thawj coj Hmoob tej duab dai nyob ntawm phab ntsa, txij Lauj Kiab Toom mus txog Lauj Npliaj Yob, yawg hlob Vaj Pov thiab ntau ntau tus thawj coj Hmoob. Tsav Foom hais tias : nyob hauv qab daim duab yog piav txog txhua tus thawj coj lawv lub neej hais tias lawv tau ua dab tsi. 

Nws pib khaws tej duab ntawd txij xyoo 1975 los, nws muaj cov duab Hmoob nyob hauv cov yeej thoj nam Thaib teb thiab nyob Los Tsuas teb txij puag thaum pib muaj tsov rog thiab tseem muaj cov duab Hmoob Chao Fa uas lawv nyob txom nyem ntsuav. 

Dhau ntawd tseem muaj daim phiaj duab qhia txog cov neeg Hmoob tseem ceeb nyob As Mes Lis Kas teb, xws li tus sawv pej xeem cev hauv nroog, cov tub ceev xwm thiab tej lwm tswj nroog huv si. Nyob hauv nws daim phiaj tseem muaj cov duab hais txog 4,000 tus Hmoob uas tau txais daim ntawv pov thawj txheej siab los ntawm txhua fab kev kawm huv si.

Cov neeg nkag mus saib hauv lub tsev khaws qub txeeg qub teg, mas lawv pom ntau yam hais txog Hmoob ntiag tug, xws li lauj kaub, yias, riam phom, dab tuav ncuav thiab txhua yam uas yog Hmoob tsim. Tej yam khoom Hmoob qub qub uas tsis siv lawm, mas tuaj yeem nqa mus tso rau hauv Tsav Foom lub tsev khaws qub txeeg qub teg tau. Txhua yam yog khoom siv tiag tiag thiab tsis yog tej daim duab uas luam tawm los xwb.

Hais txog tej tsoo tsho Hmoob, Tsav Foom hais tias : txhua hom khaub ncaws Hmoob txheej tshiab nws muaj txhij txhua, tsuas yog tshuav tej tsoo tsho qub qub txheej thaud nws thiaj tsis muaj xwb. Tas txhua hom khaub ncaws Hmoob yog xuas tes xaws tsis yog xuas tshuab luam. Nyob hauv lub tsev ntawd muaj khaub ncaws Hmoob Los Tsuas, Hmoob Thaib, Hmoob Nyab Laj, Hmoob Myanmar thiab Hmoob Suav.