Yes Loos los yog Yus Xes Npis Us yug xyoo 347 hauv Ntas Mes Tshias, zim txwv no yog Nkos Es Tshia teb. Yes Loos txiv yog ib tus neeg ntseeg ces thiaj xa nws mus kawm txuj rau tuam ceeb Los Mas. Nyob Los Mas, Yes Loos poob rau txoj kev ua si lom zem, nws ntsib kev ntxias kev sim siab ntau yam. Muaj ib hnub thaum Yes Loos tab tom mus saib cov toj ntxas, mas nws xav tsis thoob txog nws lub neej.
Xyoo 360 Yes Loos muaj 25 xyoos ces thiaj txais Cim Ntxuav ntawm Vaj Qhia Lis Npes Lis Os, nws tawm ntawm Los Mas mus rau Xis Lias teb. Yes Loos tau hla teb chaws suab puam, nws sau cia tias ‘Hav suab puam nthuav dav tsuas muaj cov av xuab zeb xws li yog dab teb, kuv tsum tawm tsam koj dhau mus, kuv xav ua Txiv Twj Cuab nyob ntawm no nrog tej me tsiaj.’
Yes Loos tau txais Cim Tiag Tes ua Leej Choj thaum muaj 38 xyoo, thiab rov los pab Vaj Qhia Ntas Mas Xus tim Ib tau ib ntus. Yes Loos kawm cov lus Hes Nplaws ntawm ib tug Leej Choj Yus Das thiab kawm haiv His Xas Lais cov txuj ntawm lawv cov xib hwb. Thaum Yes Loos kawm tiav tas ces nws thiaj mam pib txhais Ntawv Ntshiab ua lus Las Tis Nas. Phau Ntawv Ntsiab no hu tias ‘Ntawv Vus Kes’.
Yes Loos siv sij hawm 15 xyoo txwm nkaus thiaj txhais tiav. Yes Loos hais tias “Kuv tsis txhais Ntawv Ntshiab raws kuv xav, tab sis kuv txhais raws li Leej Pleev hais. Leej Ntshiab Paj Lug hais tias : Leej Pleev yog lub zog thiab yog lub tswv yim, leej twg tsis paub Ntawv Ntshiab mas nws yuav tsis paub Tswv Ntuj lub zog thiab tswv yim. Li ntawd, tus neeg twg tsis paub Ntawv Ntshiab ces nws yuav tsis paub peb tus Huab Tais Yes Xus Pleev.”
Yes Loos yog ib tus neeg siab ceev tiam sis nws khuv leej lwm tus, nws siab me tab sis nws kub siab rau lwm tus, nws coj nruj tab sis nws lub siab kub lug cuag hluav taws, nws tawv ncauj tab sis nws coj ncaj. Li ntawd nws thiaj tsis haum nrog ib co Leej Choj hauv Los Mas, ces txog nrab xyoos 380, Yes Loos thiaj txiav siab mus nyob twj cuab rau Npes Les Hes hauv His Xas Lais teb. Xyoo 420 Yes Loos thiaj tuag, nws muaj 80 xyoo.
