ZAJ NYEEM HNUB TIM 9 LUB 3 HLIS 2024
HNUB NCO TXOG LEEJ NTSHIAB FAS NTSHIS KAS NYOB LOS MAS
COV LUS NYOB HAUV LUS KAS NTAWV MOO ZOO (LK 18: 9-14)
Cov kwv tij Hmoob sawv daws, Huab Tais Tswv Ntuj tsim tib neeg kom zoo xws me ntsis li Tswv Ntuj. Huab Tais Tswv Ntuj tso nws tus duab rau hauv neeg, yog lub siab nyiam thiab hlub. Tib neeg thiaj tsom tau Huab Tais Tswv Ntuj kev hlub rau lwm tus, thiab tib neeg thiaj muaj lub siab ntshaw kom lwm tus hlub thiab nyiam tib neeg. Tab sis vim leej tib neeg lub zog me thiab lub tswv yim tsis thoob tsib mas muaj ntau zaus neeg thiaj to taub yuam kev txog kev nyiam, mas tib neeg thiaj tsis paub tias txoj kev nyiam tseeb thiab tiag yog zoo li cas. Thaum tib neeg to taub yuam kev txog kev nyiam, mas tib neeg thiaj tsis paub Huab Taus Tswv Ntuj kev hlub neeg thiab tsis paub yuav nyiam lwm tus li cas tiag. Tib neeg saib txoj kev nyiam raws li tib neeg pom thiab lub tswv yim xav tau lawm xwb, ces tib neeg thiaj tsis nco nyiam thiab hlub lwm tus; zoo li hnub no peb pom nyob hauv lub Moo Zoo.
Tus Fas Lis Xais xav tias nws yog neeg ncaj mas Huab Tais Tswv Ntuj hlub nws dua hlub lwm tus, ces nws thiaj pib tsab cai saib tsis tau lwm tus, nws saib tias nws tib leeg thiaj yog neeg zoo xwb; tus tsis ua li nws mas lawv yog neeg tsis zoo, yog neeg tsis ncaj. Nws muab nws piv rau lwm tus, ces nws thuam lawv. Nws txoj kev nyiam thiaj yog nyiam nws tus kheej nkaus xwb.
Peb los saib ntawm tus sau se, nws paub tias nws ua txoj hauj lwm tas sawv daws txiav tias tsis ncaj, ces nws tu siab, nws thov Huab Tais Tswv Ntuj kom hlub nws, mas Huab Tais Yes Xus hais tias hnub no nws huv lawm.
Cov Hmoob sawv daws, yog peb txawj tu siab rau peb cov txhaum, peb thov Huab Tais Tswv Ntuj pab; yog peb ua ib tug neeg me tsis tsab cai, tsis hais lus saib tsis tau lwm tus, mas ntseeg tau tias peb yuav yog ib tug txawj nyiam Huab Tais Tswv Ntuj thiab lwm tus.
Hnub no xav kom peb ua li ntawd, hloov peb lub tswv yim tshiab kom ntsia pom tias Huab Tais Tswv Ntuj hlub peb, thiab ua kev nkag siab tshiab tias Huab Tais Tswv Ntuj kev hlub yog zoo li cas tiag, peb puas tsom Huab Tais Tswv Ntuj kev hlub no rau lwm tus, los yog peb tsuas nyiam thiab hlub peb xwb.
Nyob zoo sawv daws.
