ZAJ NYEEM HNUB TIM 8 LUB 2 HLIS 2024
HNUB NCO TXOG LEEJ NTSHIAB ES MIS LIS AS NIS
COV LUS NYOB HAUV MAS KOS NTAWV MOO ZOO (MK 7: 24-30)
Kwv tij Hmoob sawv daws, txij lub hauv paus los mas Tswv Ntuj xaiv cov His Xas Lais los ua Tswv Ntuj haiv neeg, Tswv Ntuj cog lus tias Tswv Ntuj yuav xa ib tug tuaj cawm cov His Xas Lais thiab coj lawv rov mus cuag tau Tswv Ntuj. Tom qab no Tswv Ntuj xa nws Leej Tub Twm Zeej los yug nyob hauv haiv His Xas Lais tiag, yog Huab Tais Yes Xus. Huab Tais Yes Xus thiaj yuav xub cawm cov His Xas Lais raws li Tswv Ntuj tau cog lus tso, ces mam li cawm tas ntiaj teb neeg.
Thaum tus poj niam Hes Las tuaj thov Huab Tais Yes Xus mus ntiab dab rau nws tus me ntxhais, Huab Tais Yes Xus thiaj hais tias “Koj cia cov me nyuam noj kom tsau tso, vim yuav muab cov me nyuam cov mov los pub me nyuam dev noj mas tsis zoo.”
Huab Tais Yes Xus lo lus no kuj yog qhia nws tias Huab Tais Yes Xus xub ua hauj lwm cawm cov His Xas Lais tso, thiab kuj yog ib lo lus sim saib tus poj niam no muaj lub siab zoo li cas. Vim tias thaum cov His Xas Lais saib tsis taus leej twg mas lawv yuav cem tus ntawd ua ‘dev’. Ces Huab Tais Yes Xus txhob txwm muab tus poj niam Hes Las hu ua ‘me nyuam dev’ saib nws puas yuav npau taws.
Tab sis tus poj niam no nws hlub nws tus me nyuam heev, thiab nws muaj ib lub siab ntseeg ti txha tias Huab Tais Yes Xus cawm tau nws tus ntxhais, nws kuj tsis chim rau lo lus piv nws yog me nyuam dev; nws ua neeg me tiag. Nws tsis yws tab sis nws lees tias “Huab Tais, yog li koj hais! Tab sis cov me nyuam dev nyob hauv cov me nyuam neeg lub qab rooj xwb, cov me nyuam dev tsuas noj tej tsig mov cov me nyuam neeg ua poob saum rooj los xwb os.”
Nws lo lus no mas raug Huab Tais Yes Xus lub siab hlub neeg kawg, Huab Tais Yes Xus thiaj hais rau nws tias vim cov lus nws hais mas tus dab twb tawm hauv nws tus ntxhais mus lawm.
Kwv tij Hmoob sawv daws, niaj hnub peb kuj yuav ua ib tug neeg me zoo li tus poj niam no, peb yuav saib txoj kev nyiam thiab hlub lwm tus ua qhov tseem ceeb, peb yuav ua neeg me nyob ntawm Tswv Ntuj xub ntiag thiab ntawm peb cov kwv tij xub ntiag mus li.
Nyob zoo sawv daws.
