ZAJ NYEEM HNUB TIM 6 LUB 2 HLIS 2024
HNUB NCO TXOG LEEJ NTSHIAB PAJ LUG MIS KIS
COV LUS NYOB HAUV MAS KOS NTAWV MOO ZOO (MK 7: 1-13)
Cov Hmoob sawv daws, lub Moo Zoo hnub no peb hnov Huab Tais Yes Xus hais rau cov Fas Lis Xais thiab cov kws ntawv tias “Nej tso Tswv Ntuj Lo Lus Qhia pov tseg, nej muab nej khi rau neeg tej kev cai. Nej rhuav Tswv Ntuj Lo Lus Qhia pov tseg, nej coj tej laus cov kab ke. Nej muab tej kab ke nej txais ntawm tej laus los rhuav Tswv Ntuj Lo Lus”, mas tej zaus nej yuav xav tias yog Huab Tais Yes Xus tab tom ntuas peb sawv daws kom txhob muab peb cov kab ke poj ua tseg yawm ua cia coj los txuam nrog txoj kev ntseeg Ntuj, tej zaus nej yuav xav tias Huab Tais Yes Xus tab tom ntuas kom peb tso peb cov kab lis kev cai pov tseg. Nej xav li ntawd los yeej yog, tab sis yog tsis tas.
Tos Huab Tais Yes Xus cem cov Fas Lis Xais thiab cov kws Ntawv li ntawd, vim yav thaud Mais Xes thiab cov txwj laus muab Tswv Ntuj Lo Lus Qhia los teeb ua cov kab ke thiab txoj cai rau cov His Xas Lais coj, kom lawv nyob tau yam sib nyiam sib hlub thiab txhob hla Tswv Ntuj Lo Lus, tab sis ntev mus lawv tsis nco qab txog lub hauv paus chiv lawv cov kab ke thiab txoj cai lawm tias yog kom lawv nyob sib nyiam sib hlub, ib tug pab nres ib tug.
Nyob hauv peb cov Hmoob ntseeg txog Yes Xus lo sib yam li ntawd, muaj ntau yam hauv peb cov qub kev cai tsis haum rau kev nyiam Tswv Ntuj thiab nyiam neeg, mas peb kuj yuav tau muab tso pov tseg. Tab sis yam twg pab kom peb txawj sib nyiam sib hlub, tsis hais rau cov neeg ntseeg los rau cov tseem coj kev cai dab qhuas, mas peb kuj yuav tau sib pab kho kom haj yam zoo dua tuaj.
Yog peb xav tias yuav muab pov tseg kom tas, ces tig los ua raws li cov neeg ntseeg thoob ntiaj teb ua mas peb thiaj tsis yuam kev, tab sis yog tias qhov peb xav no ua rau peb tsis muaj lub siab nyiam cov neeg nyob koom zej koom zos nrog peb, ua rau peb thiab lawv tsis sib haum, mas puas yuav yog tej yam xis Tswv Ntuj siab? Yog peb hais tias peb coj raws Tswv Ntuj Lo Lus tab sis peb tsis muaj lub siab nyiam ces peb tab tom zoo li cov Fas Lis Xais thiab cov kws ntawv; peb yog tus neeg zoo sab nraud xwb.
Nyob zoo sawv daws.
