ZAJ NYEEM HNUB TIM 2 LUB 2 HLIS 2024
CEV YES XUS HAUV LUB TUAM TSEV TEEV NTUJ
COV LUS NYOB HAUV LUS KAS NTAWV MOO ZOO (LK 2: 22-32)
Kwv tij Hmoob sawv daws, hnub no nyob hauv lub Koom Txoos Kav Tos Liv mas peb ua cov kab ke cev tus me nyuam Yes Xus rau Tswv Ntuj hauv lub Tuam Tsev Teev Ntuj.
Raws li cov His Xas Lais kev cai, thaum yug tau thawj tus me nyuam tub mas yuav tau muab qee ua Tswv Ntuj tug vim tias thaum cov His Xas Lais ua qhev nyob Hais Nkws Tos teb, Tswv Ntuj tau nplua cov Hais Nkws Tos thiab lawv cov tsiaj thawj tus me nyuam qhib leej niad lub plab.
Cov His Xas Lais kuj muaj txoj cai tias lawv yuav tau muab tsiaj txoj sia tuaj pauv lawv tus me nyuam txoj sia ntawm Tswv Ntuj, yog li Yos Xes thiab Mab Liab thiaj coj nkawm nquab lwb rwg thiab ob tug thav nquab dawb tuaj tua theej nkawd tus me nyuam Yes Xus raws li txoj cai txiav. Mab Liab thiab Yos Xes ua li ntawd, yog vim nkawd ua neeg ncaj coj rawv Mais Xes txoj cai.
Kwv tij Hmoob sawv daws, nyob hauv peb tsoom neeg ntseeg mas peb tsis ua raws li Mais Xes txoj cai cov His Xas Lais coj lawm; tab sis qhov peb ua mas yog coj tus me nyuam mus txais lub Cim Ntxuav ntawm tus Leej Choj, thiab muab tus me nyuam cev rau Tswv Ntuj, saib Tswv Ntuj puas pom zoo cia tus me nyuam leg Tswv Ntuj txoj hauj lwm xws li ua Leej Choj, ua Leej Phauj, ua Leej Tij, Tub Tsob Hwb, Xib Hwb, los yuav cia nws ua ib tug pej xeem ntseeg.
Cov kwv tij, hnub ua hmoov cev Yes Xus hauv lub Tuam Tsev Teev Ntuj, kuj muaj ib qho zoo qhia rau peb tias tus ua niam ua txiv yog nkawd xav kom me nyuam loj hlob nyob hauv txoj kev ntseeg txog Tswv Ntuj, mas nkawd yuav tau ua tus qauv zoo rau me nyuam pom. Niam txiv kuj yuav sib pab puab thiab txheem me nyuam txoj kev ntseeg kom sawv taus ntseg thiab nyob ruaj li ncej zeb.
Yog peb cov yog niam yog txiv tsis muaj lub siab ntseeg, tsis muaj kev sib nyiam sib hlub hauv lub cuab, tsis kub siab coj me nyuam tuaj teev Ntuj; mas peb cov me nyuam puas yuav ua tau ib tug neeg ntseeg ruaj, peb cov me nyuam puas yuav paub txoj kev ntseeg, puas yuav paub nyiam lwm tus? Peb txhob tos cia Tswv Ntuj los tshoj peb tej me nyuam lub siab kom ntseeg xwb, peb yuav tau cog txoj kev ntseeg rau hauv lawv lub siab thiab.
Nyob zoo sawv daws.
