Hnub chiv tim 10 lub 3 hli ntuj 2024
Zam 3: 14-21
“vim Tswv Ntuj nyiam lub qab ntuj neeg npaum no: nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag!”
Hnub no yog hnub chiv lub lis piam 4 hauv lub caij Plaub Caug. Ntawv Moo Zoo hauv hnub no hais txog qhov pom kev thiab qhov tsaus ntuj. Tib neeg nyiam qhov tsaus ntuj dua qhov pom kev. Vim lawv cov hauj lwm phem. Zam caw peb kom siv lub sij hawm hauv lub caij plaub caug no saib ntawm peb kheej yog hais tias peb ua neej zoo li cas? Peb ua neej nyob hauv qhov pom kev los qhov tsaus ntuj.
Hauv Ntawv Moo Zoo, peb hnov tias Nis Kos Des Mos nrog Yes Xus tham. Tus Nis Kos Des Mos no yog ib tug Fas Lis Xais, nws yog cov Yus Das ib tug thawj coj.
Peb pom tias nyob hauv cov Fas Lis Xais thiab cov thawj coj muaj qee leej xav paub Yes Xus, muaj qee leej quav ntseg rau Yes Xus cov lus qhia. Dis Kos Des Mos paub tiag tiag tias Yes Xus tuaj ntawm Tswv Ntuj tuaj. Vim rau qhov hais tias “tsis muaj leej twg ua tau cov cim Yes Xus ua, yog Tswv Ntuj tsis nrog nws.” Txhais tias Nis Kos Des Mos pom cov cim uas yog Tswv Ntuj tib leeg xwb thiaj ua tau, tib neeg zoo li peb ua tsis tau. Nis Kos Des Mos tuaj cuag Yes Xus hmo ntuj. Nws tuaj ntawm kev tsaus ntuj mus cuag qhov pom kev uas yog Yes Xus. Nis Kos Des Mos txiav txim siab tias nws yuav tso qhov tsaus ntuj pov tseg ces tig los nhriav qhov pom kev hauv Yes Xus.
Yes Xus piav rau Dis Kos Des Mos tias “vim Tswv Ntuj nyiam lub qab ntuj neeg npaum no: nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Hnub no peb paub tias Nis Kos Des Mos yog ib tug neeg ntseeg zoo li peb sawv daws. Thaum nws ntsib Yes Xus lawm, nws xav tswv yim, nws hloov siab tshiab, nws txiav txim siab tias nws yuav raws Yes Xus qab ntxiv mus. Nws xaiv qhov pom kev, nws thiaj li tso qhov tsaus ntuj pov tseg.
Kwv tij hmoob sawv daws, lub caij no phim kawg uas peb yuav txiav txim siab tso qhov tsaus ntuj pov tseg, tso hauj lwm phem pov tseg, tso kev sib cav sib ceg pov tseg, tso kev npau taws pov tseg, tso kev khib siab luag tej pov tseg, tso kev ua tub sab tub nyiag pov tseg, tso kev zes luag txij luag nkawm pov tseg, tso kev ua neeg siab phem pov tseg, ces tig los xaiv qhov pom kev uas yog Yes Xus, kev sis nyiam sis hlub uas yog Yes Xus, kev sib haum xeeb uas yog Yes Xus. Yus thiaj yog ib tug neeg ncaj ncees, yus thiaj muaj lub npe ua uas Yes Xus thwj tim. Ua li ntawd mas kwv tij sawv daws, thov peb npaj peb lub siab lub tswv yim kom txhij tos txais Yes Xus sawv rov los. Nej mloog Yes Xus lub Moo Zoo thiab yuav lub siab tshiab mog!
